«Алабуга» МИЗ территориясендә “Хәят Кимья” заводы ачылышы узды

2015 елның 27 мартында Алабуга муниципаль районындагы «Алабуга» махсус икътисадый зонасы территориясендә “Хәят Кимья” заводының тантаналы ачылышы узды.
Чарада вакытлыча Татарстан Республикасы Президенты вазыйфаларын башкаручы Рөстәм Миңнеханов, Төркия икътисад министры Нихат Зәйбәкчи, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равил Зарипов, “Алабуга” СПТ МИЗ” ААҖ генераль директоры Тимур Шаһивәлиев, “Хәят Холдинг” идарә рәисе урынбасары Мәхмәт Авни Кигылы, Төркия делегациясе вәкилләре, Татарстан Республикасы министрлыклары һәм ведомстволары җитәкчеләре һәм башкалар катнашты.
Тантанада катнашучылар “Хәят Кимья” яңа заводының җитештерү мәйданчыгын карадылар һәм чыгарыла торган продукция белән, шул исәптән, санитар-гигиена кәгазь продукциясе белән таныштылар.
Вакытлыча Татарстан Республикасы Президенты вазыйфаларын башкаручы Рөстәм Миңнеханов “Хәят Кимья” җитәкчелегенә җитештерү мәйданчыгы итеп “Алабуга” МИЗны сайлаулары өчен рәхмәт белдерде һәм инвестицион проектның уңышлы булуында һәм Татарстан җитәкчелеге тарафыннан тиешенчә ярдәм күрсәтүенә ышандырды. Ул билгеләгәнчә, бу - “Алабуга” МИЗ территориясендә гамәлгә кертелгән 15нче завод.
Төркия икътисад министры Нихат Зәйбәкчи ассызыклаганча, Төркиянең яңа заводы Татарстан территориясендә урнашкан – Төркиягә кардәш булган Россия регионында. Инвестицион мөнәсәбәтләрнең нәтиҗәле үсеше өчен ике яктан да масштаблы эш зарури, дип әйтте Нихат Зәйбәкчи.
Мәгълүмат өчен:
“Хәят Кимья” җитештерү предприятиесе авыр климатик шартларга карамастан, 24 ай эчендә эксплуатациягә кертелде. Предприятие урнашкан участокның тулаем мәйданчыгы 40 га, мәйданның күләме шулай ук өстәмә инвестицион проектлар да урнаштырырга мөмкинчелек бирә. Предприятиенең корылган мәйданчыклары 73 мең квадрат метр, җитештерү күәте елына 70 мең тонна тәшкил итә. Бу инвестицион проект 400 кешене эш белән тәэмин итеп тора, Мәскәүдәге маркетинг компаниянең структурасы белән берлектә эшләүчеләр саны 650 кешегә җитә.
Беренче нигез-кәгазе 2014 елның 13 декабрендә чыгарылды һәм 2015 елның февралендә беренче кәгазь төргәкләрен Казакъстанга экспортка җибәрделәр. 2015 елның 24 гыйнварында предприятие яңа әзер продукция – туалет кәгазе, кәгазь салфетлар һәм сөлгеләр чыгара башлады.