Төркиянең икътисад министры: «Татарстан һәм Төркия уртак проектларны өченче илләрдә гамәлгә ашыра ала»

2015 елның 27 мартында Казанда Татарстан-Төркия эшлекле форумы уза. Хәзер Татарстан белән Төркиянең уртак проектларга инвестицияләү һәм аларны гамәлгә ашыру өчен уңай вакыт. Бүген Казанда узучы Татарстан-Төркия форумының пленар утырышыннан соң булган журналистлар белән очрашуда Төркия Республикасы Икътисад министры Нихат Зәйбәкҗы шундый фикер әйтте. Форумда төрле тармаклардан 20ләп Төркия компаниясе вәкилләре (автомобиль тәзелеше, җиңел һәм азык-төлек сәнәгате, төзелеш һәм төзү материаллары) катнаша.
Форумның пленар утырышында Татарстан Республикасы Президенты вазыйфаларын вакытлыча башкаручы Рөстәм Миңнеханов, Төркия Республикасы Икътисад министры Нихат Зәйбәкҗы, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равил Зарипов, Төркия Тышкы икътисадый элемтәләр советы рәисе Омәр Җиһад Вардан, Татарстан Республикасы Сәүдә – сәнәгать палатасы идарә рәисе Шамил Агиев катнашты. Утырыш алдыннан алар Татарстан Республикасының инвестицион, сәнәгать һәм агросәнәгать потенциалын чагылдыручы күргәзмә белән таныштылар.
Үзенең чыгышында Рөстәм Миңнеханов Төркия – Татарстан Республикасының әйдәүче партнерларыннан берсе, республика икътисадына чит илләр инвестицияләренең дүрттән береннән артыграгы Төркия партнерларына туры килә, дип белдерде. «Алабуга» махсус икътисадый зонасында Төркия компанияләре җитештерүләр ачты. Бүген тагын бер предприятие - «Хәят Кимья» заводы ачылачак. Тагын ике предприятие әзерлекнең төгәлләү стадиясендә.
Моннан тыш, Төркия ширкәте Татарстанда яңа проектларны гамәлгә ашыруда зур кызыксыну белән карый, шул исәптән, республика территориясендә пластик торбалар һәм теплицаларны ясау буенча яңа җитештерү ачуга кызыксынуын белдергән. “Безгә әлеге инвестицияләр бик кирәк, бу башка инвесторлар өчен сигнал булып тора”,- дип ассызыклады Рөстәм Миңнеханов.
Хезмәттәшлекне үстерү турында сөйләгәндә, ул апрель аенда Казанга Төркия парламенты рәисе Җәмил Чичекның килүе көтелүе, апрель ахырында Татарстан делегациясенең Анкарага барырга ниятләве турында хәбәр итте. Шулай ук агымдагы елның дүртенче кварталында Казанда Россия Федерациясе Президенты Владимир Путин һәм Төркия Президенты Рәҗеп Тайип Әрдоган катнашында югары дәрәҗәдәге хезмәттәшлек буенча Россия-Төркия советын уздыру да планлаштырыла.
“Без Төркиядәге компанияләр Россия базарында эшләү өчен башлангыч мәйданчык итеп Татарстанны сайлавын телибез. Безнең моның өчен уңайлы инфраструктурабыз булдырылган, белгечле кадрларыбыз бар. Без сезне киң хезмәттәшлеккә чакырабыз”, - дип әйтте Рөстәм Миңнеханов форумда катнашкан Төркиядән килгән кунакларга.
Журналистлар сорауларына җавап итеп, Төркия икътисад министры ассызыклаганча, чит ил инвесторлары өчен Татарстанда уңай шартлар тудырылган. “Минем белүемчә, Татарстанда гамәлгә ашырыла торган чит ил инвестицияләрнең 30 проценты Төркия эшмәкәрләренә туры килә. Һәм бу күрсәткеч алга таба үсәчәк. Без Татарстан партнерларыбыз белән уртак проектларны Төркиядә дә, Татарстанда да төрле юнәлешләрдә гамәлгә ашырачакбыз дип ышанам”, – диде Нихат Зәйбәкҗы. “Без машина төзелеше, машина сәнәгате, нефть эшкәртү өлкәләрендә эшебезне дәвам итәчәкбез. Ләкин яңа юнәлешләр дә булырга мөмкин - ИТ-технологияләр һәм агросәнәгать өлкәләре. Хәзер Татарстан белән Төркиянең уртак проектларга инвестицияләү һәм аларны гамәлгә ашыру өчен уңай вакыт”, - дип билгеләде Нихат Зәйбәкҗы.