Татарстан Республикасы делегациясенең Карелиягә эш визиты
2015 елның 15 һәм 16 февралендә Татарстан Республикасы Президенты Рөстәм Миңнеханов җитәкчелегендә Татарстан Республикасы делегациясе Карелия Республикасына эш визиты белән килде.
Петрозаводск шәһәренә эш визиты кысларында Татарстан Республикасы делегациясе “Калевала” ҖЧҖ агач эшкәртү компаниясенең юнәлдерелгән йомычка плиталары җитештерүенә, “Петрозаводск дәүләт университеты” ФДБУ Югары биомедицина технологияләре институтына бардылар, ИТ-парк эшчәнлеге белән таныштылар.
Татарстан Республикасы Президенты Рөстәм Миңнеханов җитәкчелегендә Татарстан Республикасы делегациясе Карелия башлыгы Александр Худилайнен белән дә очрашты.
Очрашу кысаларында Татарстан Республикасы һәм Карелия Республикасы Хөкүмәте арасында сәүдә–икътисадый, фәнни–техник, социаль һәм мәдәни хезмәттәшлек турында Килешүне гамәлгә ашыру буенча протокол имзаланды.
Татарстан делегациясе шулай ук Карелиядәге татар җәмәгатьчелеге вәкилләре белән очраштылар.