«КАМАЗ-Мастер» командасын бүләкләделәр

2015 елның 7 февралендә Казан Кремлендә «КАМАЗ-Мастер» командасын «Дакар-2015» халыкара раллиенда җиңүләре белән котладылар. Тантаналы чарада Татарстан Республикасы Президенты Рөстәм Миңнеханов катнашты.
Исегезгә төшерәбез, "Дакар-2015" халыкара раллиенда "КАМАЗ-Мастер" командасы мактау пьедесталын тулысынча биләде. Айрат Мәрдиев экипажы (Айрат Мәрдиев, Айдар Беляев, Дмитрий Свистунов) җиңүче булды. Икенче урынны Эдуард Николаев экипажы (Эдуард Николаев, Евгений Яковлев, Руслан Әхмәдиев) алды. Өченче урында – 2014 елда җиңгән Андрей Каргинов экипажы (Андрей Каргинов, Андрей Мокеев, Игорь Леонов).
Моннан тыш, команда "Africa Eco Race-2015" ралли-марафонында уңышлы гына чыгыш ясады. Гомуми зачетта дизельле “КАМАЗ”да Антон Шибалов отты, ә аның командадагы хезмәттәше Сергей Куприянов газлы дизель “КАМАЗ”ында икенче килде.
"Дакар" һәм "Africa Eco Race" раллиенда Татарстан командасы дөньяда иң яхшы команда икәнлеген раслады, диде Татарстан Президенты. "Без узышны игътибар белән күзәттек, бу бик авыр, киеренке көрәш булды. Сез мөмкин булмаганны тормышка ашырдыгыз", - дип әйтте ул. Рөстәм Миңнеханов сүзләренчә, мондый нәтиҗәгә дөрес сайланган тактика да, автомобильләрне җитди әзерләү дә, машина йөртүчеләрнең мораль-физик сыйфаты да, штурман һәм механикларның һөнәрлеге дә ярдәм иткән.
Рөстәм Миңнеханов спортчыларга дәүләт бүләкләре тапшырды. Соңыннын республика башлыгы Татарстан Республикасының дәүләт бүләкләре тапшырды.
Айдар Беляев "Татарстан Республикасының алдындагы казанышлары өчен" ордены белән бүләкләнде. Андрей Каргинов, Айрат Мәрдиев, Антон Шибалов, Евгений Метлушка "Татарстан Республикасының атказанган машина төзүчесе" мактаулы исеменә лаек булдылар.
«КАМАЗ-Автоспорт» хезмәткәрләренә дә Татарстан Республикасы Президенты Рәхмәте белдерелде. Алар арасында "КАМАЗ-Мастер" командасының җитәкчесе, "Дакар" раллиенда җиде тапкыр җиңгән Владимир Чагин да бар. Ул ассызыклаганча, «Дакар» раллиенда Татарстан командасының бу 13 җиңүе. Владимир Чагин әйтүенчә, сынауларга әзерлек ел дәвамында алып барыла. «Дакар» һәм Africa Eco Race – сезонны ачучы беренче сынаулар. Барысына да мәгълүм, безнең республика – спорт өлкәсендә Россия регионнары арасында иң алга киткән регион, һәм без моны исбатларга тырышабыз”, – дип ассызыклады Владимир Чагин.
Очрашу ахырында команда әгъзалары Рөстәм Миңнехановка “Дакар”ның “алтын бедуин”ын һәм фото бүләк иттеләр.