Давостагы бөтендөнья икътисадый форумда катнашу

2015 елның 22 гыйнварында Татарстан Республикасы Президенты Рөстәм Миңнеханов Давостагы Бөтендөнья икътисадый форумның ике сессиясендә, Казакъстанның Икътисадый хезмәттәшлек һәм үсеш оешмасы белән хезмәттәшлек итү ил программасы турындагы Меморандумны имзалау тантанасында катнашты.
“Россиянең яңа икътисадый чынбарлыгы” сессиясендә Рөстәм Миңнеханов форумның оештыру комитеты чакыруы буенча булды. Сессия спикерлары арасында Россия туры инвестицияләр фонды генераль директоры Кирил Дмитриев һәм Ernst&Young компанияләре рәисе Марк Вейнбергер да бар иде.
“Европаның ике җитди бурычы – үсеш һәм тотрыклылык” сесссиясе эшенә берничә Европа иленең җитәкчеләре катнашты – Ирландия, Нидерланд һәм Финляндия премьер- министрлары Энди Кенни, Марк Рюгге һәм Александр Стубб, Германия вице- канцлеры, икътисад һәм энергетика министры Зигмар Габриэль.
Казакъстан премьер- министры Кәрим Масимов чакыруы буенча Рөстәм Миңнеханов шулай ук Казакъстанның Икътисадый хезмәттәшлек һәм үсеш оешмасы белән хезмәттәшлек итү ил программасы турындагы Меморандумны имзалау тантанасында катнашты.
Исегезгә төшерәбез, 21 гыйнварда Татарстан Республикасы Президенты Рөстәм Миңнеханов Руанда Президенты Поль Кагаме һәм Бөекбританиенең экс- премьеры Тони Блэр катнашындагы эшлекле иртәнге ашында катнашты.
Республика башлыгы Рөстәм Миңнеханов иң эре компанияләр җитәкчеләре белән берничә эшлекле очрашу үткәрде. Татарстан Президенты Европада, Якын көнчыгышта, Африкада, Россиядә һәм БДБ иллләрендә сату итү буенча Cisco компаниясе президенты Крис Дедикот белән очрашты. Президент Татарстан белән дөньяның әйдәп баручы IT- компаниясе белән булган нәтиҗәле хезмәттәшлекне билгеләп үтте. Ул Крис Дедикотка “Иннополис” проектын гамәлгә ашыру барышы хакында сөйләде һәм Cisco компаниясен Татарстанда булдырылучы IT- шәһәргә чакырды.
Шулай ук Рөстәм Миңнеханов Ecolab - экологик карарлар өлкәсендәге лидерларның берсе булган компаниянең башкарма вице- президенты Кристоф Бек, Danfoss – җылылык автоматикасын һәм суыткыч техникасын җитештерүче Дания компаниясе президенты һәм генераль директоры Бьерн Кристиансен белән очрашты. Татарстан Республикасы Президенты компанияләр җитәкчелеге белән Татарстанда мөмкин булган эшчәнлек юнәлешләре хакында фикер алыштылар.
Татарстан Республикасы Президенты шулай ук Бөтендөнья икътисадый форумының ике сессиясендә катнашты.