Гайдар форумында икътисадның реаль секторы нәтиҗәлелеген үстерү мәсьәләләре каралды

2014 елның 15 гыйнварында VI Гайдар форумы кысаларында "Икътисадның реаль секторы: нәтиҗәлелеккә юл" панель дискуссиясе узды. Россия Федерациясе Дәүләт Думасы рәисе Сергей Нарышкин фикер алышуның модераторы булды.
Панель фикер алышуда Татарстан Республикасы Президенты Рөстәм Миңнеханов, Россия Федерациясе сәнәгать һәм сәүдә министры Денис Мантуров, Россиянең һәм халыкара әйдәп баручы экспертлары, бизнес–даирәләр вәкилләре катнашты.
Татарстан Республикасы Президенты әйтүенчә, республика милкендә берничә эре предприятие бар. Аның сүзләренчә, республика җитәкчелеге, нәтиҗәле стратегик партнер килү шартларында гына, дәүләт катнашындагы предприятиеләрен хосусыйлаштыру мәсьәләсен карарага әзер. «Республика җитәкчелеге эре предприятиеләрнең акцияләр пакетын сату турындагы карарны, сатып алынган бизнесны үстерергә әзер булган стратегик партнер табылса гына, кабул итә. Әгәрдә стратегик партнер бар икән, һәм безгә бу файдалы һәм табышлы булса, без үзебезнең акцияләребезне реализацияләргә әзер. Үз вакытында без Казан вертолет заводының өлешен “Россия вертолетлары”на саттык, һәм бүген әлеге карарыбыз дөрес булганлыгын күрәбез – хәзер ул республиканың иң уңышлы предприятиеләренең берсе, – дип ассызыклады Рөстәм Миңнеханов. – Һәм контроль пакеты бездә булган компрессор заводын «ГМС-Групп»ка сату, шулай ук кирәк иде, чөнки предприятие үзе генә әлеге базар шартларында уңышлы эшли алмас иде”.
«Барлык карарларны без максатлардан чыгып кабул итәбез. Әйтик, «КАМАЗ»да өлешебез юк, әмма без завод белән бик якыннан эшлибез, «Ростехнология» белән дә, чөнки предприятие эшенә бөтен шәһәр иминлеге бәйле».
«Регионның чынлап торып икътисад үсешендә ихтыяҗы булырга тиеш, хосусый һәм дәүләт бизнесы булуына карамастан, - дип ышанып әйтте Татарстан Президенты. – Инвесторларны җәлеп итү өчен инженер инфраструктурасы булырга тиеш, һәм бу беренче адымнарны дәүләт башкаруы зарури. Без Татарстанда шуның белән шөгыльләнәбез дә инде».
Рөстәм Миңнеханов хәбәр иткәнчә, 2014 ел нәтиҗәләре буенча Татарстанның тулаем региональ продукты 1,63 трлн. сум, сәнәгать продукциясе җитештерү – 1,65 трлн. сум, төп капиталга инвестицияләр күләме – 542 млрд. сум тәшкил итте. «Үсеш темплары теләгәнчә зур түгел, ләкин минем фикеремчә, перспективалар әйбәт, республикада масштаблы проектлар гамәлгә ашырыла», - дип белдерде Татарстан Президенты.
Ул Россия Федерациясе сәнәгать һәм сәүдә министры Денис Мантуровка мөрәҗәгать итте. «Бүген безнең шөбһә бик зур. Өч көн элек мин сәнәгатьчеләрне, банкирларны җыйдым, һәм без барысы да тукталып калганын күрәбез, - дидеРөстәм Миңнеханов. – Кредитлар буенча ставкалар бик зур. Моннан тыш, беренче мәртәбә бездә эшсезлек артты. Шуңа күрә Россия Федерациясе Сәнәгать һәм сәүдә министрлыгына, ил Хөкүмәтенә оператив карарлар табуларын үтенәм».