Татарстан Республикасы Хөкүмәте премияләренә 10 республика бәйгесе лауреатларын һәм дипломантларын бүләкләү тантанасы узды

2014 елның 26 декабрендә Татарстан Республикасы Министрлар Кабинетында Татарстан Республикасы Премьер–министры Илдар Халиков катнашында сыйфат өчен Татарстан Республикасы Хөкүмәте премияләренә 10 республика бәйгесе лауреатларын һәм дипломантларын бүләкләү тантанасы узды. Сыйфат өчен Татарстан Республикасы Хөкүмәте премияләренә дәгъва кылу буенча республикакүләм бәйге 2003 нче елның апрелендә гамәлгә куелган. Премияләр ел саен, бәйге нигезендә, предприятиеләргә һәм оешмаларга продукция һәм хезмәтләр сыйфаты өлкәсендәге нәтиҗәләр, сыйфат белән идарәнең югары нәтиҗәле ысулларын гамәлгә кертү өчен тапшырыла.
Татарстан Республикасы Премьер–министры урынбасары – Татарстан Республикасы сәнәгать һәм сәүдә министры, сыйфат өчен Татарстан Республикасы Хөкүмәте премияләрен бирү буенча совет рәисе Равил Зарипов әйтүенчә 2014 нче елда 86 оешма заявка калдырган, шул исәптән Татарстан чикләреннән читтәге хуҗалык итүче субъектлардан 6 заявка кабул ителгән. Казан, Яр Чаллы, Әлмәт, Түбән Кама шәһәрләре, шулай ук Лаеш, Алексеевски, Яшел Үзән районнары предприятиеләре һәм оешмалары аеруча зур активлык күрсәткән. Равил Зарипов сәламәтлек саклау һәм социаль хезмәтләр, төзелеш һәм мәгариф өлкәләрендә эшләүче сәнәгать предприятиеләре, оешмаларының конкурста актив төстә катнашуын билгеләп узды.
Сыйфат өчен Татарстан Республикасы Хөкүмәте премияләренә дәгъва кылу буенча республика конкурсын уздыру кысаларында, “2014 нче елда ТРның сыйфат буенча иң яхшы менеджеры”, “ТР югары уку йортлары студентлары һәм аспирантлары арасында сыйфат мәсьәләләрен карауга багышланган иң яхшы фәнни-тикшеренү эше” бәйгеләре үткәрелгән. “Сыйфат өчен ТР Хөкүмәте премияләрен бирү буенча Совет карары нигезендә, 7 оешмага “конкурс лауреаты” исеме бирелгән һәм конкурсның 19 дипломанты билгеләнгән.
Сыйфат өчен Татарстан Республикасы Хөкүмәте премияләренә быел түбәндәге оешмалар лаек булды:
– җитештерү өчен продукция һәм халык кулланышындагы товарлар җитештерү өлкәсендә эшчәнлек алып баручы, эшчеләр саны 250 дән артык предприятие һәм оешмалар категориясендә – Түбән Каманың “Түбән Кама нефтехим” ААҖ;
– хезмәт күрсәтү өлкәсендә эшчәнлек алып баручы, хезмәткәрләре 250 дән артык предприятия һәм оешмалар категориясендә – “Казан Гипронииавиапромы” ЯАҖ, Республика балалар клиник хастаханәсе, “Татспецтранспорт” идарәче ширкәте” ҖЧҖ.
– халык кулланышындагы товарлар җитештерү өлкәсендә эшчәнлек алып баручы, эшчеләр саны 250 дән артмаган предприятиеләр категориясендә – “АК БАРС Строй” ҖЧҖ.
– хезмәт күрсәтү өлкәсендә эшчәнлек алып баручы, хезмәткәрләре 250 дән артмаган оешмалар категориясендә – Әлмәт политехник техникумы, Республика медицина китапханә-мәгълүмат үзәге.