Казанда “Татарстанның эшлекле хезмәттәшләре” форумы узды

2014 елның 6 декабрендә Г.Камал исемендәге Татар дәүләт академия театрында “Татарстанның эшлекле хезмәттәшләре” бөтендөнья форумының пленар утырышы узды. Чарада Татарстан Республикасы Президенты Рөстәм Миңнеханов, республиканың министрлыклар һәм ведомстволар җитәкчеләре катнашты. Форум эшендә Россиянең 54 регионыннан һәм чит илләрдән татар эшмәкәрләре катнаштылар.
Форумда Татарстан Республикасы Премьер–министр урынбасары– Татарстан Республикасы сәнәгать һәм сәүдә министры Равил Зарипов доклад белән чыгыш ясады. Ул республиканың халыкара һәм регионара сәүдә–икътисадый хезмәттәшлегенең нәтиҗәле үсешен ассызыклады һәм Татарстанның сәнәгать потенциалын үстерүдә ярдәм итүче мөһим инструментларын, сату базарын киңәйтү ысулларын атады. “Татарстанның сәүдә хезмәттәшләре саны 130 җитә. Төркия, Чехия, Нидерланд, Италия, Польша, Германией, Финляндия, Венгрия илләре белән инвестицион һәм сәүдә–икътисадый хезмәттәшлек актив үсә. 2013 елда Татарстанның регионара сәүдә әйләнеше 509 млрд. сум тәшкил итте. Мәскәү, Ленинград, Самара, Чиләбе өлкәләре, Башкортостан Республикасы белән элемтәләр нәтиҗәле үсә. Бүгенге көндә Татарстан Республикасы сәүдә–икътисадый һәм фәнни–техник хезмәттәшлек итү турындагы килешүләрне Россиянең 69 регионы белән төзеде”, –дип хәбәр итте Татарстан Республикасы сәнәгать һәм сәүдә министры Равил Зарипов.
Равил Зарипов сүзләренә караганда, халыкара һәм регионара хезмәттәшлекне үстерүдә Россиядәге һәм ерак һәм якын чит илләрдәге Татарстанның вәкиллекләре һәм сәүдә йортлары мөһим роль уйный. Хәзерге вакытта 23 вәкиллек эшләп килә, болардан 15 –чит илләрдә һәм 8– Россия регионнарында. Быел Татарстанның даими вәкиллекләре Кырымда һәм Кытайда ачылды.
Форумда республиканың министрлыклар һәм ведомстволар җитәкчеләре, илнең төрле регионнарыннан Бөтендөнья татар конгрессы вәкилләре һәм татар эшмәкәрләре чыгыш ясадылар.
Чараны йомгаклап, Татарстан Республикасы Президенты Рөстәм Миңнеханов мондый форумнарның кирәклеген ассызыклады, татар эшмәкәрләренең бер–берсе белән ешрак очрашырга, элемтәләр белән алмашырга һәм тәҗрибәләре белән уртаклашырга тиеш, дип белдерде. Республика башлыгы Бөтендөнья татар конгрессының Татарстаннан читтә яшәгән татар арасында бәйләүче күпер булуын әйтте.
Чара Татарстан Республикасы дәүләт бүләкләрен тапшыру белән тәмамланды.