Чаллыда автомобиль техникасы базарына ярдәм чаралары турында киңәшмә узды

2014 елның 2 декабрендә Чаллыда Россия Федерациясе Премьер–министры Дмитрий Медведев рәислегендә Россиянең автомобиль техникасы базарына ярдәм чаралары турында киңәшмә уздырды. Россия Федерациясе Сәнәгать һәм сәүдә министрлыгы автомобиль җитештерүче предприятиеләргә ярдәм итү буенча яңа тәкъдимнәр әзерләде. Моның хакта Чаллыда Россия Федерациясе сәнәгать һәм сәүдә министры Денис Мантуров хәбәр итте.
Киңәшмәдә Татарстан Республикасы Президенты Рөстәм Миңнеханов, Россия Федерациясе Хөкүмәте рәисе урынбасары Аркадий Дворкович, Россия Федерациясе сәнәгать һәм сәүдә министры Денис Мантуров, Россиянең эчке эшләр министры Владимир Колокольцев, Татарстан Республикасы Премьер–министры урынбасары –Татарстан Республикасы сәнәгать һәм сәүдә министры Равил Зарипов, Россия Федерациясе һәм Татарстан Республикасы министрыклар һәм ведомстволар вәкилләре, тармак предприятиеләре җитәкчеләре катнашты.
Дмитрий Медведев билгеләгәнчә, бүгенге көндә Россия автомобиль базарындагы гомуми торышы тотрыксыз, барлык сегментларда җитештерүдә һәм сатуда тискәре динамика күзәтелә. “Россия автомобиль техникасы базары - машина төзелешеның системасын булдыручы тармагының берсе”, - дип әйтте Россия Хөкүмәте Рәисе. “Хәзерге вакытта ул тармакта 400 предприятие эшли, алар техниканың бөтен категорияләрен чыгаралар - җиңел машиналар, коммерция автомобильләре дә, йөк машиналарын да, автобусларны, махсус һәм хәрби транспортны, автокомпонентларны. Шул предприятиеләр арасында Россия территориясендә дөньядагы иң эре автомобиль концерннары тарафыннан ачылган заводлар да бар. Тулаем алганда, компанияләр сәнәгать җыю режимында эшлиләр. 2011 елдан әлеге режим җитештерүне локальләштерүнең мәҗбүри булуын күз алдында тота, һәм мондый практика яхшы нәтиҗәләр бирә. Яңа һәм кулланышта булган автомобильләрне импортка чыгару кими, ә безнең илдә җыелучы машиналар өлеше, киресенчә, үсә, бу – уңай күренеш. Шулай да базарда гомуми вәзгыять тотрыксыз, гомумән, ул тискәре динамика күрсәтә. Җитештерүнең һәм сатуның кимүе бөтен сегментларда да диярлек күзәтелә. Бәлки, җиңел машиналарны җитештерүгә тискәре тенденцияләр азрак тәэсир итте. Хәтта кимүне исәпкә алып та, фаразлар буенча, аларны җитештерү быелга планлаштырылган күрсәткечләрдән артырга тиеш. Иң проблемалы сегмент - коммерция техникасы, йөк автомобильләре, җиңел коммерция автомобильләре, автобуслар җитештерү".
Дмитрий Медведев хәбәр иткәнчә, ил җитәкчелеге тарафыннан автомобиль сәнәгатенә ярдәм буенча кайбер чаралар кабул ителгән.
Аерым алганда, автомобильләргә ихтыяҗ артуны стимуллаштыру өчен ике программа гамәлгә кертелгән. Аларның берсе кысаларында төбәкләргә федераль бюджеттан автобуслар һәм торак–коммуналь хуҗалык предприятиеләре ихтыяҗлары өчен газ-мотор ягулыклы техника сатып алуга субсидия тәкъдим ителә. 2014 елда әлеге максатларга федераль бюджеттан 4 миллиард сумга якын акча бүленә, бу төбәкләргә 2,5 мең берәмлек техника сатып алырга мөмкинлек бирәчәк. Сатуларны стимуллаштыруга багышланган икенче программа, яңа машина сатып алучыларга иске машиналарын утильләштерүгә тапшырган вакытта яки trade-in механизмы аша ташлама алу хокукын бирә.
Россия Федерациясе сәнәгать һәм сәүдә министры Денис Мантуров үз чиратында, “Автомобильләр базарындагы тискәре динамикага карамастан, Россия бүгенге көндә Европада Германия һәм Бөекбританиядән кала, зурлыгы буенча өченче автомобиль базары булып кала”, дип саный. Дәүләт вакытында булышмаса, вәзгыять катлаулырак булыр идее. Ул, аерым алганда, Дмитрий Медведевка Россия Федерациясе Сәнәгать һәм сәүдә министрлыгының 2015 елда 3 миллиард сум финанслау күләме белән газ-мотор ягулыгындагы автотехника сатып алуны субсиядиләү программасын дәвам итү башлангычын хуплау үтенече белән мөрәҗәгать итте.
Россия Федерациясе сәнәгать һәм сәүдә министры шулай ук ведомствоның Россиядә алга таба да автомобиль җитештерүне стимуллаштыру буенча тәкъдимнәрен әйтеп китте. Денис Мантуров хәбәр иткәнчә, аерым алганда, ил автомобиль сәнәгатенә дәүләт компанияләре һәм дәүләт катнашындагы предприятиеләр тарафыннан автотранспорт сатып алу механизмы аша ярдәм итү мөмкинлеге карала (223 номерлы Федераль Закон кысаларында).