Казанда ТР машина төзелеше предприятиеләренең Координация советының 2 утырышы узды

Бүген, 2014 елның 3 декабрендә “Машина төзелеше. Металл эшкәртү” 14 халыкара махсуслаштырылган күргәзмә һәм «Technoсварка» 9 махсуслаштырылган күргәзмә кысаларында Татарстан Республикасының машина төзелеше предприятиеләренең Координация советының 2 утырышы узды. Татарстан Республикасы Премьер-министр урынбасары – Татарстан Республикасы сәнәгать һәм сәүдә министры Равил Зарипов модератор булган әлеге утырышты, Татарстан Республикасы Президенты Рөстәм Миңнеханов, “ВИАМ” ФДУП генераль директоры Евгений Каблов, “НИАТ” ААҖ генераль директоры Олег Сироткин, Россиянең сәнәгать һәм сәүдә министры киңәшчесе Виктор Семенов һәм башкалар катнашты.
Катнашучылары сәламләп, “Машина төзелеше - ил үсешенең мөһим күрсәткече булып тора”, - дип әйтте Равил Зарипов. “Бүгенге көндә республиканың машина төзелеше комплексы 150 эре һәм урта предприятиеләрне һәм оешмаларны үз эченә ала”, -дип хәбәр итте ул.
Татарстан Республикасы Президенты машина төзелеше тармагы предприятиеләренә дәүләт ярдәме турында, шулай ук Татарстанда һөнәри белем буенча булдырыла торган ресурс үзәкләре челтәре турында сөйләде. «Быел без шундый биш үзәк төзедек һәм аның нәтиҗәләрен күрәбез инде, - дип белдерде Рөстәм Миңнеханов. – Бу бик кирәкле һәм мөһим эш, ул киләчәктә дә дәвам итәчәк».
Татарстан Президенты билгеләгәнчә, Координация советын оештыру бик вакытлы иде. “Республика үзенең сәнәгать потенциалы белән Россиянең алдынгы регионнарының берсе. Үткән елдагы сәнәгать җитештерүнең күләме – 1,5 трлн. сум, ә быел – 1,650 трлн. сум тәшкил итәчәк дип көтелә“,- диде Президент. Аның сүзләренчә, машина төзелеше комплексы – республика икътисадының итөп тармаклырының берсе, бу өлкә предприятиеләрендә 140 мең кеше хезмәт итә, 25 предприятие дәүләт оборона заказы кысаларында эшлиләр.
Татарстан Президентының сүзләренә караганда, машина төзелеше комплексын үстерүдә төп игътибар инновацияләр һәм инвестицияләр ярдәмендә сәнәгать модернизациясенә бирелә. Россиянең икътисадны үстерү министрлыгы программасы кысаларында уникаль инженер үзәкләре төзелде: машина төзелеше өлкәсенә лазер технологияләрен кертү, медицина өлкәсендә робот- симуляторлар җитештерү. Декабрьдә химия технологияләре өлкәсендә үзәк ачу планлаштырылган.
Эре Россия компанияләре белән хезмәттәшлек итү турында сөйләгәндә, Р.Миңнеханов билгеләгәнчә, узган елны республиканың машина төзелеше комплексы предприятиеләренең продукциясен «РЖД», «Роснефть», «Лукойл», «Газпром» кебек компанияләренә сату күләме 14 млрд. сум тәшкил итте.
Хәзеге вакытта Татарстанның сәнәгать предприятиеләре машина төзелеше өлкәсендә яңа проектлар, инновацион югары технологияле җитештерүләр өстендә эшлиләр, дип билгеләде Р.Миңнеханов. Мәсәлән, “”Камаз”да техник яңартып кору буенча 2020 елга хәтле озак вакытлы инвестицион программа эшләп килә.
«Минемчә, бүгенге утырышта күп кенә кызыклы тәкъдимнәр булачак, - дип белдерде Татарстан Президенты чыгышының азагында. - Машина төзелеше тармагы предприятиеләренә бүген берләшергә һәм мөмкинлекләрен бергә тупларга кирәк».
Яңа технологияләрне һәм яңа материалларны куллану перспективалары турында «ВИАМ» ФДУП генераль директоры Евгений Каблов сөйләде.
«НИАТ» ААҖ генераль директоры Олег Сироткин үз докладында металл эшкәртүнең лазер технологияләрен куллану өстенлекләре турында, шулай ук шушы технологияләрне җитештерүдә сертификацияләү хакында сөйләде. Шулай ук докладлар белән машина төзелеше тармагының кайбер белгечләре дә чыгыш ясады.