Казанда «Машина төзелеше.Металл эшкәртү» күргәзмәсе ачылды

2014 елның 3 декабрендә “Казан ярминкәсе” күргәзмә үзәгендә “Машина төзелеше. Металл эшкәртү. Казан” 14 халыкара күргәзмәсе һәм «Technoсварка» 9 махсуслаштырылган күргәзмәсе эшен башлап җибәрде.
Тантаналы ачылышта Татарстан Республикасы Президенты Рөстәм Миңнеханов, Россия Федерациясе сәнәгать һәм сәүдә министры киңәшчесе Виктор Семенов, Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равил Зарипов, Милли авиация технологияләре институты генераль директоры Олег Сироткин, Бөтенроссия авиация материаллары институты генераль директоры, Россия Федерациясе Академиясенең академигы Евгений Каблов, Татарстан Республикасы Сәнәгать-сәүдә палатасы идарәсе рәисе Шамил Агеев, "Казан ярминкәсе" ААҖ генераль директоры Лев Семенов һәм башкалар катнашты.
Беренче булып, катнашучыларны Татарстан Республикасы Президенты Рөстәм Миңнеханов сәламләде. “Елдан-ел күргәзмәдә катнашучылар саны артуы сөендерә, быел аларның саны инде 149 га җиткән", - дип мөрәҗәгать итте Рөстәм Миңнеханов. Президент кичә Россия Хөкүмәте башлыгы Дмитрий Медведев катнашында чаралар узганын искәртеп, "ТАНЕКО" нефть эшкәртү комплексында яңа установка куелуын, Премьер-министрның Чаллыда "Ford Sollers" яңа заводы ачылышында, "КАМАЗ" заводында булганын искәртеп үтте. “Бу – республикабызда машина төзелеше киң колач җәюе, әлеге өлкәнең үсеш кичерүе турында сөйли. Куәтле модернизациядән һәм партнерларыбыз ярдәменнән башка ирешеп булмас иде моңа, шуңа күрә күргәзмә кебек мәйданчык булуы бик яхшы", - дип белдерде Рөстәм Миңнеханов. Ул чыгышын тәмамлап, күргәзмәдә катнашучыларга уңышлар теләде.
Виктор Семенов Россиянең сәнәгать һәм сәүдә министры Деннис Мантуров исеменнән сәламләде һәм аның котлау сүзләрен җиткерде. “Металл эшкәртү җиһазларын җитештерүчеләренә һәм кулланучыларына әлеге чара бизнес–мәйданчыкка әйләнде”, – дип язылган иде сәламләүдә.
Авиация технологияләренең милли институты генераль директоры Олег Сироткин “Бүгенге көндә Татарстан Россия күләмендә инновацион сәясәт лидеры. Республикада компетенция үзәкләре, аерым алганда, лазер технологияләре үзәкләре булдырыла, авиа һәм двигательләр төзелешендә сезнең мөмкинлекләрегез зур. Чыннан да, Татарстан Россиядә сәнәгать үсеше өчен зур әһәмияткә ия", - дип билгеләп узды ул.
Авиация материаллары Бөтенроссия институты генераль директоры Евгений Каблов республиканың инновацион потенциалын үсерү өлкәсендә тотрыклы һәм систмалы рәвештә эш алып барган өчен рәхмәтен белдерде.
Сәламләү сүзләреннән соң кунаклар символик тасманы кистеләр. Кунаклар ике павильонда урнашкан экспозиция белән танышып чыктылар.
Күргәзмәләр Казанда 3 декабрьдән 5 декабрьгә кадәр эшлиячәк. Быел күргәзмәнең экспонатлары буларак Россиянең 28 шәһәреннән һәм дөньяның 4 иленнән 149 компания, шулай ук дөньяның 15 иленнән продукция җитештерүче оешмалар тәкъдим ителгән.
Күргәзмәләр ачылышы программасы кысаларында Татарстанның машина төзелеше предприятиеләренең Координация советы утырышы узачак.