Татарстан белән Чехия "Алабуга" МИЗда станоклар җитештерү буенча ниятләр турында меморандум имзалады

2014 елның 6 ноябрендә Татарстан Республикасы Сәнәгать һәм сәүдә министрлыгы белән Чехиянең "АЛТА-Инвест" компаниясе арасында "Алабуга" МИЗда металл эшкәртү станоклары җитештерү турындагы меморандум имзаланды. Документка Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Равил Зарипов һәм "АЛТА" компаниясе идарә рәисе Владимир Плашил кул куйды.
Меморандум Казан Кремлендә Татарстан Республикасы Президенты Рөстәм Миңнеханов һәм Чехия сәнәгать министры Ян Младек катнашында имзаланды.
Искәртеп узабыз, 5-7 ноябрьдә Чехия Республикасы делегациясе Татарстанга рәсми визит белән килде. Кунаклар Казанда кайбер эре предприятиеләр «Татхимфармпрепараты» ААҖ, «Казан вертолет заводы» ААҖ һәм башкаларда булды. Моннан тыш, Татарстан Республикасы Сәүдә-сәнәгать палатасында Чехия делегациясе катнашында түгәрәк өстәл һәм Чехия һәм Татарстан хоккей ветераннарының матчы узды.
Журналистларга биргән интервьюсында Ян Младек узенә Казанның бик ошавын әйтте, шулай ук республиканың эре сәнәгать предприятиеләренең казанышларына да таң калган. "Без ике як өчен дә файдалы хезмәттәшлекне үстерербез дип өметләнәбез", - дип билгеләде ул.
Чехия Республикасының Көньяк Моравия крае губернаторы Михаил Гашек журналистларның сорауларына җавап биреп, Татарстанның Россиядә лидер булуын ассызыклады һәм Көньяк Моравия краеның да Чехия Республикасында шуңа омтылганын әйтте. Ул хәбәр иткәнчә, Татарстан белән машина төзелеше өлкәсендә, ике республика югары уку йортлары арасында, шулай ук яңа технологияләр базасында мәгълүматлаштыру өлкәсендә тыгыз хезмәттәшлек ниятләнә. "Без үзебезнең яктан уникаль проект - интеграцияләнгән транспорт системасын тәкъдим итә алабыз. Бу шактый уңышлы һәм игътибарга лаек проект", - диде М.Гашек.
Үз чиратында, Татарстан Республикасы Президенты Рөстәм Миңнеханов Чехиядән зур делегация килүен билгеләп үтте. "Нәтиҗәле эш башкарылды. Бездә хезмәттәшлек өчен юнәлешләр күп. Бүген Сәүдә-сәнәгать палатасында 4 документ имзаланды, Кремльдә дә бик мөһим юнәлеш - станоклар төзүгә бәйле меморандумга кул куелды. Бүген без Татарстан - машина төзүче төбәк дип әйтә алабыз һәм безнең көндәшлеккә сәләтлелек үзебездә нинди станоклар булуга бәйле булачак", - диде Р.Миңнеханов. Аның сүзләренчә, Чехия партнерлары бу юнәлештә отышлы шартлар тәкъдим итә. Шулай ук «Татхимфармпрепараты» компаниясе белән, агросәнәгать комплексында да хезмәттәшлек ниятләнә. "Без аралашуны хезмәттәшлекнең перспективалы юнәлешләре буенча дәвам иттерәчәкбез", - дип нәтиҗә ясады Татарстан Республикасы Президенты.