“Татарстанныкын сатып ал!” акциясе үткәрелә

2014 елның 17 октябрендә Хөкүмәт Йортында Татарстан Республикасында авыл хуҗалыгы продукциясе, чимал һәм азык-төлек базарларының торышын контрольдә тотучы оператив штабның чираттагы утырышы узды. Оператив штаб әгъалары илдә, шул исәптән Татарстанда җитештерелгән товарларга ихтыяҗны стимуллаштыру буенча тәкъдимнәр карадылар.
Республикада “Татарстанныкын сатып ал!” акциясе дәвам итә. Бу акция Татарстан Республикасы Президенты Рөстәм Миңнеханов инициативасы белән башланып киткән иде.
Оператив штаб утырышында Татарстан Республикасы сәнәгать һәм сәүдә министры урынбасары Рашат Фәттахов доклад белән чыгыш ясады. Ул илдә, шул исәптән республикада җитештерелгән товарларны базарда алга җибәрү өчен ММЧда уздырылган һәм уздырырга планлаштырылган чаралар турында сөйләде.
Рашат Фәттахов ассызыклаганча, акциянең кысалары киңәйтелә һәм азык-төлек һәм сәнәгать товарлары белән беррәттән, монда хезмәт күрсәтү өлкәсе дә кертелә.
Татарстан Республикасы Сәнәгать һәм сәүдә министрлыгы тарафыннан Татарстан Республкасы территориясендә үз эшчәнлеген алып баручы ваклап сату сәүдә челтәрләре белән дә эш алып барыла.