Икътисадый совет утырышында миниципаль дәрәҗәдә сәнәгать паркларын һәм мәйданчыкларын булдыру һәм үстерү мәсьәләләре каралды

2014 елның 15 октябрендә Теләче районында Татарстан Республикасы Президенты Рөстәм Миңнеханов рәислегендә узган Татарстан Республикасы Министрлар каршындагы Икътисадый Совет утырышында миниципаль дәрәҗәдә сәнәгать паркларын һәм мәйданчыкларын булдыру һәм үстерү мәсьәләләре хакында фикер алыштылар.
Икътисадый совет утырышында Татарстан Республикасы Премьер-министры Илдар Халиков, Россия Федерациясе Икътисадый үсеш министрлыгының Кече һәм урта эшмәкәрлекне, көндәшлекне үстерү департаменты җитәкчесе Наталья Ларионова, Россия Федерациясе сәнәгать һәм сәүдә министрлыгының региональ сәнәгать сәясәте департаменты директоры урынбасары Андрей Кулинцев, Татарстан Ресубликасы икътисад министры Артем Здунов, Татарстан Республикасы сәнәгать һәм сәүдә министры урынбасары Рашат Фәттахов, Татарстан Республикасы министрлыклары һәм ведомстволары, республика муниципаль районнары, сәнәгать парклары һәм предприятиеләре җитәкчеләре катнашты.
Рөстәм Миңнеханов ассызыклаганча, республикада тулаем төбәк продуктында кече һәм урта эшмәкәрлек өлешен 34 процентка кадәр арттыру бурычы куелган. Аның сүзләренә караганда, Татарстанда кече һәм урта эшмәкәрлектә сәнәгать предприятиеләре өлеше 16 процент кына тәшкил итә. Нигездә, кече һәм урта эшмәкәрлек сәүдә һәм хезмәт күрсәтү өлкәсендә эшли. Рөстәм Миңнеханов билгеләгәнчә, республиканың потенциаль мөмкинлекләре кече һәм урта эшмәкәрлек сегментында сәнәгать предприятиеләре өлешен ике тапкыр арттыру мөмкинлеге бирә.
Бүген Татарстанда 17 муниципаль районда һәм бер шәһәр округында 22 сәнәгать паркы эшли. Резидентларның гомуми саны – 110. Алар 1,5 меңнән артык эш урыны булдырган, 2013 елда предприятиеләрнең гомум табышы 2,4 млрд сум тәшкил иткән.