ТР Хөкүмәте Йортында берничә инвестпроектны карадылар
Татарстан Инвестиция советы утырышында логистика, сәнәгать, авыл хуҗалыгы, коммерцияле күчемсез милек, инвестицион инфраструктура һәм территорияләрне үстерү өлкәсендәге проектлар тәкъдим ителде.
Аны Татарстан Рәисе Рөстәм Миңнеханов үткәрде. Утырышта Татарстан Республикасы сәнәгать һәм сәүдә министры урынбасары Марат Миңнебаев катнашты.
Мәсәлән, «Виланнель» компаниясе Чаллыда сэндвич-панельләр җитештерүне оештырырга һәм Идел буе һәм Урал федераль округлары территориясендә әлеге продукциягә кытлыкны ябарга планлаштыра.
«УК «АСТ» инвестицион проектының максаты – «Кукмара-2» сәнәгать паркын төзү. Ул энергетика һәм транспорт инфраструктурасы белән җиһазландырылачак. Икътисадның тармагы – җитештерү һәм склад логистикасы. Эш алты резидент белән алып барыла.
«Татэнерго» Түбән Камада диспетчерлык пункты булган техник үзәк төзергә тәкъдим итә. Проект шәһәр халкын җылылык белән тәэмин итүнең сыйфатын һәм ышанычлылыгын арттыруга, филиалның аерым структураларын халык ихтыяҗларын канәгатьләндерү өчен бер урынга берләштерүгә юнәлдерелгән.
«Тургай» Лаеш районында резидентлар өчен җитештерү корпуслары, инженер һәм транспорт инфраструктурасы объектлары, идарәче компания биналары, административ-көнкүреш корпусы, хезмәт күрсәтү объектлары, парковкалар, шулай ук кече һәм урта бизнес предприятиеләре өчен кирәкле җитештерү-склад зоналары урнаштырылган сәнәгать паркы булдырырга планлаштыра. 11 потенциаль резидент белән ниятләр турында килешү имзаланган инде.