Россия Сәнәгать һәм сәүдә министрлыгы башлыгы урынбасары Роман Чекушов Татарстан предприятиеләренең потенциалы белән танышты
Статс-секретарь – РФ сәнәгать һәм сәүдә министры урынбасары Роман Чекушов Зеленодольск предприятиеләрендә булды, анда аларның җитештерү һәм экспорт потенциалы белән танышты.
Аңа эре Россия ритейлерларының Wildberries һәм Ozon логистик объектларын күрсәттеләр. Бу предприятиеләрдә эш даими камилләшә бара: роботлаштыру һәм процессларны автоматлаштыру үсеш ала. Эш сәфәрендә аны ТР сәнәгать һәм сәүдә министры урынбасары Герман Лернер һәм шәһәр мэры Михаил Афанасьев озата йөрде.
Тәүлегенә 30 тонна куәтле «Бәхетле» туңдырылган ярымфабрикатлар җитештерү фабрикасында китерү сервисларына һәм Россиянең иң эре ритейлерлары киштәләренә китерелә торган продукцияне күрсәттеләр.
Татарстан агач эшкәртү комбинатында фанера, мебель һәм детальләр җитештерү белән таныштырдылар. Предприятие җитәкчелеге белән очрашуда экспортка ярдәм чаралары, шулай ук сәүдә мәйданчыкларында продукция алу мөмкинлеген киңәйтү турында фикер алыштылар. Шулай ук Роман Чекушовка Ростех дәүләт корпорациясенең «ПОЗиС» компаниясенең җитештерү куәтләрен күрсәттеләр. Ул суыткыч техникасы җитештерү һәм аның перспектив үрнәкләре, шулай ук медицина эшләнмәләре экспозициясе белән танышты.
5 февральдә Роман Чекушов Казанның берничә предприятиесендә булачак.
Әлеге визит «Халыкара кооперация һәм экспорт» илкүләм проекты максатларына һәм бурычларына ирешергә ярдәм итә.