Татарстанның иң яхшы инженерлары Бөек Петрның Санкт-Петербург политехник университетында стажировка уза
Программада – заманча технологик платформалар һәм университет партнерларының җиһазлары белән эшләүне үз эченә алган максатчан гамәли модульләр.
34 тыңлаучы арасында – Татарстанның сәнәгать комплексының 12 тармагы вәкилләре, алар «Ел инженеры» республика конкурсында җиңү яулаучылар. Стажировка 17-21 ноябрь көннәрендә уза. Бу интенсив график белән квалификация күтәрүнең беренче офлайн-программасы һәм Бөек Петрның Санкт-Петербург политехник университетының реаль җитештерү-тикшеренү мохитенә чуму.
Җайлаштырылган һәм файдалы программа өчен катнашучылар өч тармак төркеменә бүленгән иде:
Беренчесе – машина төзелеше; авиатөзелеш; приборлар төзү; радиоэлектроника, элемтә, фотоника, телекоммуникацияләр.
Икенчесе – нефть сәнәгате; химия, нефть химиясе, биотехнологияләр; газ сәнәгате; энергетика.
Өченчесе – төзелеш, төзелеш материаллары җитештерү; транспорт, юл хуҗалыгы; җиңел, агач эшкәртү, целлюлоза-кәгазь сәнәгате; авыл хуҗалыгы, азык-төлек һәм эшкәртү сәнәгате.
Стажировканың соңгы көнендә «Цифрлы инжиниринг – технологик лидерлыкның нигезе» лекциясе планлаштырыла, ә аннары тармак эксперты белән «Сәнәгать компаниясенең инновацион экосистемасын стратегик үстерү» түгәрәк өстәле оештырылачак. Моннан тыш, программага йомгак ясау, кире элемтә җыю һәм квалификация күтәрү турында таныклыклар тапшыру да көтелә.