Татарстан делегациясе Оманга эш визиты белән килде
Татарстан сәнәгать һәм сәүдә министры урынбасары Герман Лернер җитәкчелегендә ул «Россия-Оман» бизнес-форумында катнашты. Делегация составына «Татарстан Республикасы сәнәгатен үстерү фонды» АҖ генераль директоры Марат Бохараев керде. Шунысын да билгеләп үтәргә кирәк, быел Россия белән Оман Солтанатлыгы арасында дипломатик мөнәсәбәтләр урнаштыруга 40 ел тулды.
Форумда Россия һәм Оман рәсми һәм эшлекле даирәләре вәкилләре арасында махсуслаштырылган В2В-, В2G- һәм G2G- сөйләшүләр узды, шулай ук индустриаль һәм экскурсион сәяхәтләр оештырылды. Моннан тыш, сәүдә һәм экспорт, энергетика, фәнни-техник хезмәттәшлек һәм башкалар буенча тармак тематик фикер алышулар узды.
Делегация «Россия – Оман: киләчәккә караш» пленар сессиясендә катнашты, аны «Росконгресс» фонды оештыра. Чарада Россия Хөкүмәте Рәисе урынбасары Марат Хөснуллин чыгыш ясады.
«Күрәбез, ике яклы туризм үсә. Һичшиксез, Оманның «Россия – Ислам дөньясы: KazanForum» халыкара икътисадый форумында катнашуын бәялибез. Товар әйләнешен арттыруда, «Төньяк – Көньяк» транспорт коридоры буенча транзит ташуларны үстерү, масштаблы инфраструктура, сәнәгать һәм торак проектларын бергәләп гамәлгә ашыруда зур потенциал бар. Шулай ук торак-коммуналь өлкәне модернизацияләү һәм үстерү тәҗрибәсе дә файдалы булачак. Көчләрне берләштерү ике ил икътисады өчен дә үсешнең яңа нокталарын булдырырга мөмкинлек бирәчәк», - диде ул.