Олег Коробченко: «Безнең төп бурыч – халыкны сыйфатлы продуктлар белән тәэмин итү»
ТР Фәннәр академиясендә Татарстан Премьер-министры урынбасары – сәнәгать һәм сәүдә министры Олег Коробченко, РФ Сәнәгать һәм сәүдә министрлыгының Эчке сәүдәне үстерү департаменты директоры Никита Кузнецов, Татарстан компанияләре вәкилләре һәм башкалар катнашында «Базарлар һәм сәүдә үзәкләренең актуаль мәсьәләләре» дигән түгәрәк өстәл узды.
– Татарстан, гадәттәгечә, Идел буе федераль округында ваклап сату товар әйләнеше буенча алдынгы урында тора. Узган ел нәтиҗәләре буенча ул 7,4% үсеш белән 1,6 трлн.сумнан артып киткән, ә быелның 7 аенда 1 трлн.сумга якын тәшкил иткән. Безнең республикада 80нән артык эре сәүдә үзәге бар. Челтәр компанияләренең бөтен линейкасы бар – бу X5 Retail Group, Магнит, Лента, Ашан, «Леруа Мерлен». Шулай ук безнең төбәк челтәрләре бар – бу Бэхетле, Находка, Августина, Мегастрой, – диде Олег Коробченко. – Безнең, әлбәттә, төп бурыч – халыкны сыйфатлы продуктлар белән тәэмин итү, ниндидер гадәттән тыш хәлләр булган очракта кешеләрне тулысынча ашату. Икенче бурыч, мөгаен, безнең сәүдә челтәрләрендә Татарстан продукциясе сатылсын, әмма без барысын да җитештермибез, шуңа күрә, әлбәттә, башка төбәкләр һәм чит ил продукциясе бар.
Ул шулай ук сәүдә челтәрләрен эре шәһәрләрдә генә түгел, ә авыл җирлекләрендә дә үстерергә кирәклегенә игътибар итте.
– Авыл районнары турында онытсак, алар үлә һәм республиканың урбанизациясе башлана, барысын да безнең эре шәһәрләр йота, ә районнарны урманнар каплый. Без авылларның юкка чыгуына юл куймаска тиеш. Безнең программа бар, аның буенча без нәкъ менә район сәүдәсенә ярдәм итәбез, сәүдә кибетләре йөрсен, азык-төлек һәм беренче кирәк-ярак товарларын сатсын өчен һәр чакрым өчен субсидияләр бирәбез, – диде министр.
Түгәрәк өстәлдә катнашучылар күпләп һәм ваклап сату базарларын үстерү мәсьәләләре һәм перспективалары, сәүдә үзәкләрен ничек үстерү, шәһәрләрнең, авыл җирлекләренең сәүдә-иҗтимагый инфраструктурасын үстерүдә дәүләт ярдәме мөмкинлекләре һәм башкалар турында фикер алыштылар.