Татарстанның нефть, газ химиясе комплексына багышланган эшлекле форумнар

16 июльдә Татарстан Республикасы Сәнәгать һәм сәүдә министрлыгында Татарстан Республикасында нефть саммиты һәм Татарстанның нефть, газ химиясе форумын үткәрү мәсьәләләренә багышланган киңәшмә булды. Аны Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов үткәрде.
Министр Р. Зарипов агымдагы елның 23 июлендә республикабызда Татарстан Республикасы Президенты Р. Миңнеханов җитәкчелегендә Нефть саммиты үткәреләчәген хәбәр итте. Саммит Карабаш бистәсендә булачак. Форум барышында "Татнефть" һәм Татарстан Республикасының кече нефть компанияләренең 2013 елның 1 яртыеллыгына эш нәтиҗәләренә йомгак ясалачак. Саммитта катнашучылар югары нәтиҗәләргә ирешү мөмкинлеге бирә торган технологияләр кертү буенча тәҗрибә уртаклашачак, республикада нефть чыгаруның киләчәге хакында фикер алышачак.
4-6 сентябрь көннәрендә "Казан ярминкәсе" ААҖ территориясендә Татарстанның газ, нефть химиясе форумы үтәчәк, анда Татарстан Республикасы Президенты Р. Миңнеханов катнашыр дип көтелә. Булачак форумның төп чаралары турында министр урынбасары Х. Баһманов бәян итте.
Форум кысаларында «Нефть, газ. Нефть химиясе-2013» ХХ Халыкара күргәзмәсе, «GEO-КАЗАН: Геологоразведка. Геодезия. Картография» III махсуслаштырылган күргәзмә, «Пластик & каучук» IV махсуслаштырылган күргәзмә, «XXI гасыр экотехнологияләре һәм җиһазлары» VIII махсуслаштырылган күргәзмә, «Нефть чыгару урыннарын әзерләүнең соңгы стадиядә нәтиҗәлелеген арттыру мәсьәләләре» халыкара фәнни-гамәли конференция, «Сыеклыклар һәм газ чыгымнарын һәм күләмен үләчәүне метрологик яктан тәэмин итүнең актуаль мәсьәләләре» халыкара метрология конференциясе, «Нефть химиясе һәм нефть эшкәртү тармакларын үстерүнең төп тенденцияләре» фәнни-гамәли конференциясе, «Геодезия һәм геомәгълүмат системаларының актуаль мәсьәләләре» II халыкара фәнни-гамәли конференция һ.б үтәчәк.
Форум Татарстан Республикасы Сәнәгать һәм сәүдә министрлыгы, Татарстан Республикасы Экология һәм табигать байлыклары министрлыгы, Татарстан Республикасы Фәннәр Академиясе, Казан (Идел буе) федераль университеты ярдәме белән оештырыла.
Татарстанның нефть, газ химиясе форумында (күргәзмәләр, конференцияләр һәм түгәрәк өстәлләр) Россиянең һәм чит илләрнең 1800 дән артык белгечләре, галимнәре, тармак министрлыклары һәм ведомстволары, сәнәгать предприятиеләре вәкилләре катнашачак.