Универсиада объектларын энергия белән тәэмин итүне оештыру штабының чираттагы утырышы булды

14 июньдә Татарстан Республикасы Министрлар Кабинетында Казан шәһәрендә үтәчәк 2013 елгы XXVII Бөтендөнья җәйге универсиадасы объектларын энергия белән өзлексез тәэмин итүне оештыру буенча оператив штабның Татарстан Республикасы Премьер-министры И. Халиков җитәкчелегендә чираттагы утырышы булачак. Утырышта “ФСК ЕЭС” ААҖ Идарә Рәисе О. М. Бударгин катнаша.
Утырышта 2013 елгы Универсиада объектларын энергия белән тәэмин итү өчен җаваплы предприятиеләрнең әзерлеге каралачак.
Универсиада объектларын энергия белән тотрыклы һәм имин тәэмин итү мәсьәләләре Штаб утырышларында берничә тапкыр каралды инде. Республикада энергетика системасын 2013 елгы Универсиаданы үткәрүгә әзерләү буенча чаралар планы гамәлгә ашырыла, планда оештыру-техник чаралар белән беррәттән энергетика объектларын төзү һәм реконструкцияләү дә каралган.

Планда билгеләнгән эшләрнең шактые, шул исәптән түбәндәгеләр төгәлләнгән инде:
- электроэнергетика объектларында диспетчерлар һәм оператив персонал катнашында һәлакәткә каршы тренировкалар үткәрелгән;
- Татарстан Республикасы электроэнергетика субъектларының һәлакәт запаслары кирәкле матди ресурслар (ремонт запасы) белән тәэмин ителгән;
- җиһазларны ремонтлау графиклары кыскартылган;
- электр куәтенә кытлыкны киметү максатларында Казан энергетика районында сәнәгать предприятиеләрендә электр энергиясен куллануны азайту чаралары үткәрелгән һ.б.
Хәзерге вакытта Казанның ТЭЦ-1, ТЭЦ-2, ТЭЦ-3 предприятиеләренең Универсиада вакытында тулы көчләренә эшләвен тәэмин итү чаралары күрелә.

Универсиада объектларын энергия белән тотрыклы тәэмин итү эше төгәлләнеп килә.
Универсиадага әзерлек кысаларында гамәлгә ашырылган чараларының тагын берсе –«ФСК ЕЭС» ААҖнең Помара–Удмурт ВЛ 500кВ төзелеше, ул 14 июньдә Мари Эл Республикасының Помара шәһәрендә ачылачак. Тантаналы вакыйгада «ФСК ЕЭС» ААҖ Идарә Рәисе О. М. Бударгин, Татарстан Республикасы Премьер-министры И. Халиков, Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов, министр урынбасары Х.А.Баһманов, энергетика идарәсе башлыгы Г.Г.Садриева катнашачак.
Помара-Удмурт ВЛ-500 кВ төзелеше “Урта Идел” ОЭС Төньяк энергорайонын электр белән тәэмин итү проблемаларын чишү, Казан энергорайоны кытлыгын киметү, Урта Идел регионының энергетика комплексын үстерү, регионнар арасында 500 кВ система булдыручы элемтәләрне арттыру максатларында башланды. Яңа линияне сафка бастыру Казан шәһәрендә үтәчәк 2013 елгы ХХVII Бөтендөнья җәйге универсиадасын электр энергиясе белән тотрыклы рәвештә тәэмин итү мөмкинлеге бирәчәк. Линия Мари Эл һәм Татарстан, Удмурт республикалары, Киров өлкәсе территорияләре аша үтә.