Казан кооперация институты – илнең әйдәп баручы уку йорты

30 майда Татарстан Республикасы Президенты Р. Миңнеханов Казан кооперация институтында булды, югары уку йортының җитәкчеләре һәм студентлары белән очрашты. Очрашуда Татарстан Республикасы сәнәгать һәм сәүдә министры урынбасары Г. Әхмәдиева, министрлыклар, ведомстволар һәм республиканың югары уку йортлары җитәкчеләре катншаты.
2013 елда әлеге уку йортына 225 яшь тула. Уку йортының үзгәртеп кору елларында ачылган Татарстан филиалы бүген илнең әйдәп баручы вузларының берсе. Биредә сәүдә һәм җәмәгать туклануы, икътисад, менеджмент, таможня эше, туризм, сервис, кунакханә эше буенча белгечләр әзерләнә.
Бүген Казан кооперация институтында көндезге уку һәм читтән торып уку бүлекләрендә 4,7 мең студент белем ала. Вуз үз алдына 2015-2016 нчы елларга студентлар санын 5,5 мең кешегә кадәр арттыру бурычын куя. Моннан тыш, яңа перспективалы һәм хезмәт базарында ихтыяҗ булган юнәлешләр буенча елем бирү дә планлаштырыла.
Сәүдә һәм куллану хезмәтләре күрсәтүне үстерү – республика икътисадында өстенлекле юнәлешләрнең берсе. Бүген бу тармак динамик үсештә. Татарстанда куллану базары тармагында 16 меңләп ваклап сату предприятиесе, 9 меңләп җәмәгать туклануы предприятиесе исәпләнә, аларда 300 меңнән артык кеше эшли.
2012 елда Татарстан Республикасы буенча ваклап сату әйләнеше 650 млрд.сум, үсеш 116% тәшкил итте. Агымдагы елның гыйнвар–апрель айларында бу күрсәткечләр 210 млрд.сум, 104% булды. Әлеге күрсәткечләр буенча Татарстан Республикасы Идел буе федераль округында беренче өчлеккә керә.