Казан дары заводына – 225 ел

24 майда Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов Казан казна дары заводы ветераннарын, хезмәткәрләрен заводның 225 еллык юбилее белән котлады.
Министр сүзләренчә, “1788 елда сафка баскан предприятие тарихы дәүләтебез оборонасын ныгыту, Россиядә дары җитештерә башлау һәм дары җитештерүне арттыру тарихына тыгыз бәйләнгән. Казан дары заводы Бөек Ватан сугышында җиңүгә үзеннән саллы өлеш кертте. Ул елларда фронт өчен дары, “Катюша” өчен реактив снарядлар җитештерелде, фронтка өзлексез сугыш кирәк-яраклары озатылып торды”.
Сугыш елларындагы фидакарь хезмәт, җитештерүдә махсус техника кулланган, граждан билгеләнешендәге продукция эшләп чыгарган өчен завод Хезмәт кызыл Байрагы Ордены, Октябрь Революциясе Ордены, 1 дәрәҗә Бөек Ватан сугышы ордены белән бүләкләнде.
Хәзерге вакытта әлеге предприятие динамик үсештәге күппрофильле оешма. Ул дәүләтнең махсус программаларында актив катнаша, биредә граждан юнәлешендәге күптөрле продукция эшләп чыгарыла.