Рөстәм Миңнеханов: Татарстан белән Ульяновск өлкәсенең сәүдә-икътисадый багланышлары киң
Бүген Татарстан Республикасы Президенты Рөстәм Миңнеханов Ульяновск өлкәсе Губернаторы вазыйфаларын вакытлыча башкаручы Алексей Русский белән очрашты. Очрашуда шулай ук Татарстан Республикасы Премьер-министры урынбасары – Татарстан Республикасы сәнәгать һәм сәүдә министры Алберт Кәримов та катнашты. Очрашу Казан Кремлендә узды.
Рөстәм Миңнеханов билгеләп үткәнчә, бүген Татарстан һәм Ульяновск өлкәсенең сәүдә-икътисадый багланышлары зур. Ульяновскка бензин һәм дизель ягулыгы, шиннар, йөк автомобильләре, химия продукциясе, ашлама, катнаш азык, пыяла һ.б. китерелә. Ульяновск өлкәсеннән Татарстанга йөк һәм җиңел автомобильләр, автобуслар, цемент, түбә ябу материаллары, агросәнәгать комплексы продукциясе, тимер-пресс җиһазлары кертелә.
«Безнең, ара якынлыгын, бер төрле сәнәгать һәм авыл хуҗалыгы тармакларын исәпкә алып, сәүдә-икътисадый элемтәләрне үстерү перспективалары яхшы. Безнең предприятиеләр төрле юнәлешләрдә партнерлыкны актив үстерергә әзер», - дип ассызыклады ТР Президенты.
Очрашу барышында машина төзелеше, авиатөзелеш, цифрлаштыру, мәгариф һәм фән, туризм һәм мәдәният өлкәләрендә хезмәттәшлекне ныгыту мәсьәләләре турында фикер алыштылар.
Рөстәм Миңнеханов Ульяновск өлкәсендә яшәүче татарларга ярдәм күрсәткән өчен аерым рәхмәт белдерде, бу – 150 меңгә якын кеше.
Шулай ук ТР Президенты Алексей Русскийга ТАССРның 100 еллыгы уңаеннан медаль тапшырды.