POZIS Казан университеты белән хезмәттәшлекне ныгыта
POZIS (Россия Машина төзүчеләр союзына керә) Казан милли тикшеренү технология университеты белән берлектә партнерлык хезмәттәшлегенең берничә перспектив юнәлешен билгеләде. Төп мәсьәләләр буенча фикер алышу КНИТУ ректоры Юрий Казаков белән ПОЗиС компаниясе базасында эшлекле очрашу барышында узды.
ПОЗиС КНИТУ белән кадрлар әзерләү буенча озак вакытлы хезмәттәшлекне бәйли. Хәзерге вакытта компаниядә КНИТУ тәмамлаган 206 кеше эшли, шуларның 64 хезмәткәре 30 яшькә кадәр. Аларның күбесе төрле дәрәҗәдәге җитәкчеләр булып тора. Агымдагы елда 15 студент «ПОЗиС» АҖендә җитештерү практикасы узды.
Конструктив диалог форматында узган очрашу барышында нәтиҗәле һәм үзара файдалы партнерлыкны алга таба үстерү белән бәйле берничә перспектив юнәлеш буенча фикер алыштылар.
КНИТУ җитәкчелеге югары уку йорты турында презентация материалы, аның фәнни потенциалы һәм инновацион мөмкинлекләре белән таныштырды. Үз чыгышында уку йорты вәкилләре берничә юнәлешне аерып күрсәтте, аларда уртак эшчәнлек ике якка да максималь нәтиҗәгә ирешергә мөмкинлек бирәчәк. Барыннан да элек, бу өстенлекле һәм перспектив юнәлешләр буенча дисциплинаара фәнни-тикшеренү проектларында катнашу, махсус материаллар буенча лаборатор сынаулар һәм тәҗрибә эшләре үткәрү, химия һәм гальваник җитештерү буенча проблемалы мәсьәләләрне хәл итү һәм башкалар.
Шулай ук машина төзелеше тармагы өчен югары уку йортларында белгечләр әзерләү проблемалары да каралды.
«Бүген машина төзелеше тармагында югары квалификацияле һәм талантлы белгечләргә ихтыяҗ зур, аларга предприятиенең конкуренциягә сәләтлелеге һәм киләчәге бәйле. Нәкъ менә шуңа күрә безнең компания уку йортлары белән хезмәттәшлеккә йөз тота һәм булачак инженерларда, конструкторларда, механикларда, технологларда һәм башка белгечлекләрдә эш күнекмәләрен формалаштыру өчен берничә проектны гамәлгә ашыра. Без шулай ук фән, инновация һәм җитештерү өлкәсендә хезмәттәшлекне үстерергә ниятлибез, - дип билгеләп үтте Россия Машина төзүчеләр берлегенең Татарстан төбәк бүлеге рәисе, «ПОЗиС» АҖ компаниясе генераль директоры Радик Хәсәнов.
Очрашу кысаларында вуз вәкилләре предприятиенең җитештерү объектларында булды, шул исәптән логистик үзәктә һәм суыткыч җитештерүдә, анда POZIS бренды астында заманча суыткыч җиһазлар җитештерелә.
Шулай ук университет базасында диалогны дәвам итү турында килешүгә ирешелде.