Татарстан һәм Индонезия хезмәттәшлеге

Татарстан Республикасы делегациясенең Индонезиягә визиты кысаларында 2 майда Р. Миңнеханов җитәкчелегендәге делегация Индонезия Сәнәгать министрлыгында, Индонезия Тышкы эшләр министрлыгында, Индронезия икътисады мәсьәләләре буенча координация министрлыгында очрашуларда катнашты, Индонезиянең Сәүдә-сәнәгать палатасында ике илнең бизнес даирәләре өчен түгәрәк өстәл оештырылды.
Индонезиягә Татарстан делегациясе визитының төп максаты Татарстан һәм Индонезия компанияләре арасында эшлекле багланышларны җайга салу иде. Делегация составына Татарстан Республикасы Президентының халыкара мәсьәләләр буенча ярдәмчесе Радик Гыйматдинов, республиканың Инвестиция үсеше агентлыгы җитәкчесе Линар Якупов, Сәүдә-сәнәгать палатасы рәисе Шамил Агеев, Татарстан Республикасының сәнәгать һәм сәүдә министры беренче урынбасары Руслан Кәбиров, "Ак Барс" холдинг компаниясе" ААҖ генераль директоры Иван Егоров, һ.б кертелде.
Визит кысаларында Татарстанның һәм Индонезиянең сәнәгать һәм икътисадый потенциалы
күрсәтелде, машина төзелеше, нефть чыгару һәм нефть эшкәртү, ислам финанслары һәм югары технологияләр тармакларында хезмәттәшлекнең перспектив юнәлешләре билгеләнде. Татарстан һәм Индонезия сәүдә-сәнәгать палаталары арасында килешүгә кул куелды.