Лин-технологияләр кертү хакында Килешү имзаланды

2013 елның 22 мартында Чаллы шәһәрендә VII Халыкара Лин-конференция булды. Конференциядә дәүләт хакимияте органнары, 32 эре корпорация һәм предприятие вәкилләре, Бөекбритания, Япония, Италия, Төркия Лин-тренерлары, массакүләм мәгълүмат чаралары вәкилләре катнашты.
Татарстан Республикасында Лин-технологияләрне кертү тәҗрибәсе хакында доклад белән Татарстан Республикасы сәнәгать һәм сәүдә министры Р. Зарипов чыгыш ясады. Ул билгеләп үткәнчә, Татарстан Республикасында Сакчыл җитештерү проектын кертү уңышлы бара. Республикада ысулый база эшләнде, Лин-технологияләрне җитештерүгә кертү, Лин-тренерлар әзерләү эше алып барыла.
10 предприятиедә финанслашу шартларында Лин-технологияләр кертелә. Бу предприятиеләрдә хезмәт җитештерүчәнлеге 10-30 процентка артты. Лин-технологияләр кертүдән узган ел республика 6 миллиард сум табыш алды.
Лин-технологияләр кертелгән предприятиеләр: «КАМАЗ», «ЕлаЗ», «М.Горький ис. судно төзү заводы.», «ПОЗИС», «КМПО», «КАПО» «Казанкомпрессормаш», «Казан электротехника заводы», «Казан вертолет заводы», «Әлмәт торба заводы», «Вакууммаш».
«КАМАЗ» ААҖ 2006 елдан бирле «Сакчыл җитештерү» принциплары нигезендә эшли, икътисадый нәтиҗә 23 млрд. сум тәшкил итә.
«Бүген Лин-технологияләрне республикада төрле тармакларда эшләүче 130 предприятие үзләштерә. Алар арасында машина төзү, химия, нефть химиясе, энергетика, җиңел сәнәгать, авыл хуҗалыгы, транспорт, сәламәтлек саклау һәм башка тармаклар предприятиеләре бар. Бу киңкырлы проект республика җитәкчелеге һәм Татарстан Республикасы Пркезиденты Р. Миңнехановның шәхсән ярдәм итүе аркасында мөмкин булды», – дип билгеләп үтте Р.Зарипов.
Лин-конференция кысаларында Татарстан Республикасы Сәнәгать һәм сәүдә министрлыгы һәм “Ростехнологияләр” дәүләт корпорациясе арасында хезмәттәшлек итү турында Килешүгә кул куелды.
Документны Татарстан Республикасы сәнәгать һәм сәүдә министры Р. Зарипов һәм “Ростехнологияләр” дәүләт корпорациясе генераль директоры беренче урынбасары А.Алешин имзалады.