Россиядә һәм Татарстанда металл эшкәртү җиһазлары җитештереләчәк

2013 елның 5 мартында Мәскәүдә "Россия Федерациясендә металл эшкәртү җиһазлары җитештерүне булдыру шартлары һәм перспективалары" Халыкара инвестиция форумы булды. Форумда Татарстан Республикасы Президенты Р. Миңнеханов, Россия Федерациясе сәнәгать һәм сәүдә министры Д. Матуров, Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов, Россия Федерациясе субъектларының хөкүмәт вәкилләре (Ростов, Свердловск һәм Ульяновск өлкәләре), чит илләрнең (Германия, Чехия, Швейцария, Италия, Австрия, Япония) станоклар төзү буенча 40 предприятиесе вәкиле һәм 5 милли берлек (Немец машина төзү предприятиеләре берлеге, Италиянең Станоклар, роботлар, автоматлаштыру ситемалары һәм башка продукция җитештерүчеләр ассоциациясе, Швейцариянең Машина төзелеше, электротехника һәм металлургия сәнәгате һәм технологик яктан аларга бәйле тармаклар берләшмәсе, Япониянең Станок төзүчеләр ассоциациясе, Чехиянең Машина төзелеше технологияләре берлеге) вәкилләре катнашты. Татарстан Республикасыннан форумга КНИТУ-КАИ, «КНИАТ» ААҖ, «Алабуга» МИЗ вәкилләре барды.
Форумны Россия Федерациясе Сәнәгать һәм сәүдә министрлыгы, Татарстан Республикасы Хөкүмәте, Свердловск өлкәсе Хөкүмәте, Ульяновск өлкәсе Хөкүмәте оештырды.
Инвестиция форумының максаты – чит илләрнең станоклар төзү тармагы предприятиеләренә Россиянең металл эшкәртү җиһазлары базары һәм металл эшкәртү җиһазларын иң эре кулланучылары хакында мәгълүмат бирү.
Форумда катнашучылар Россия һәм чит ил инвесторларына дәүләт ярдәме белән таныштылар, уртак предприятиеләр булдыру перспективаларын карадылар.
Форум кысаларында Россия территориясендә металл эшкәртү җиһазларын җитештерү буенча уртак предприятиеләр төзүгә кагылышлы берничә халыкара килешүгә кул куелды.
Татарстан Республикасы Президенты Р. Миңнеханов Ростов, Свердловск, Ульяновск өлкәләре җитәкчеләре белән берлектә Россия Федерациясе субъектларында машина төзү технологияләре кластерлары оештыру хакында Беркетмәне имзалады.
Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов һәм «Джошкуноз Метал Форм» компаниясе генераль директоры Шукрю Тетик Татарстан Республикасы Сәнәгать һәм сәүдә министрлыгы һәм «Coskunoz Metalform» компаниясе арасында уртак эшчәнлек турында беркетмәгә кул куйдылар.
Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов билгеләп үткәнчә, Татарстан Республикасында Россия һәм чит ил инвесторлары өчен законнар базасы бар, алар өчен кирәкле шартлар тудырылган, салым ташламалы бирелә, уртак инвестиция проектларын гамәлгә ашыру өчен кадрлар җитәрлек. Республиканың сәнәгать предприятиеләре инвестиция проектларын гамәлгә ашыру кысаларында үз акчалары һәм федераль бюджет акчалары хисабына техник җиһазларын алмаштыралар, яңарталар. 2012 елда төп капиталга инвестицияләр 6 млрд. АКШ доллар тәшкил итте. Р. Зарипов әйтүенчә, федераль хөкүмәт, беренче чиратта, Россия Федерациясе Сәнәгать һәм сәүдә министрлыгы ярдәме белән республиканың сәнәгать предприятиеләре җитештерүен федераль акчалар хисабыннан модернизацияләү мөмкинлеге барлыкка килде.
2013 елның 6 мартында Халыкара инвестиция форумында катнашучы 8 чит ил компаниясе (ŠKODA MACHINE TOOL, TAJMAC-ZPS, TOS VARNSDORF, TOSHULIN (Чехия), WFL Millturn Technologies GmbH & Co. KG (Австрия), EMAG GmbH, Hermle AG (Германия), Coskunoz (Төркия) Татарстан Республикасына киләчәк.
Чит ил кунаклары “Алабуга” махсус икътисадый зонасына барачак, аның инвестиция потенциалы, гамәлдәге сәнәгый, инженерлык, телекоммуникация, транспорт, таможня инфраструктурасы белән танышачак.