Татарстан Хөкүмәте һәм ЧТПЗ компаниясе арасында хезмәттәшлек итү турында килешү төзелде

14 февральдә Татарстан Республикасы Сәнәгать һәм сәүдә министрлыгының һәм Татарстан Республикасы Икътисад министрлыгының уртак коллегиясендә Татарстан һәм ЧТПЗ компаниясе арасында “Татарстанның киләчәге колледжы” проектын гамәлгә ашыру мәсьәләсе буенча хезмәттәшлек итү турындагы килешүгә кул куелды. Документны Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов һәм “ЧТПЗ” ААҖ Директорлар советы Рәисе Александр Фролов имзалады.
Әлеге социаль-белем бирү проекты Әлмәтнең “Алнас” предприятиесе территориясендә гамәлгә ашырыла, бу предприятие “ЧТПЗ” холдингының “Римера” компанияләр төркеменә керә. Казанда имзаланган документның төп максаты – ТР территориясендә һөнәри белем өлкәсендәге эшчәнлекне үстерү өчен шартлар тудыру, белем бирү максатларында инфраструктураны камилләштерү һәм матди база булдыру. Уртак гамәлләр шулай ук сәнәгать өлкәсендә кадрлар потенциалын үстерүгә, “Киләчәк колледжының” Татарстан Республикасы сәнәгать предприятиеләре өчен югары квалификацияле кадрлар әзерләү буенча нәтиҗәле эшчәнлеге өчен шартлар тудыруга юнәлдереләчәк.
Билгеле булганча, проект 2012 елның 21 ноябрендә Россия Федерациясе Президенты В.В. Путин җитәкчелегендәге Күзәтүчеләр Советы тарафыннан хупланды һәм “Әлмәт һөнәр колледжы” базасында эшли башлады. Биредә 50 студенттан торган ике төркем шөгыльләнә. Алар “Станокчы (металл эшкәртү)” һәм “Электр җиһазларын ремонтлау һәм аларга хезмәт күрсәтү монтеры” белгечлекләре буенча белем ала. 2013 елның гыйнварыннан иң яхшы укучы студентларга “Алнас” заводы һәм “ЧТПЗ” компаниясе хисабына персональ стипендияләр түләнә башлады.