Татарстан Республикасы предприятиеләре Төбәк компетенцияләр үзәге эшеннән 92% канәгать

2020 елның 8 июле, чәршәмбе

Татарстан Республикасы «Хезмәт җитештерүчәнлеге һәм халыкны эш белән тәэмин итүгә ярдәм» илкүләм проекты чараларын актив тормышка ашыра. Төп башкаручы – хезмәт җитештерүчәнлеге өлкәсендә компетенцияләрнең төбәк үзәге («Татарстан Республикасы Министрлар Кабинеты каршындагы Татарстан Республикасы Энергияне сак куллану технологияләре үзәге» ДАУ), аның эше предприятиеләр тарафыннан 92% дәрәҗәсендә бәяләнгән.

Төбәкләрдәге компетенцияләр үзәкләре эшеннән канәгать калу-калмау дәрәҗәсен «Хезмәт җитештерүчәнлеге өлкәсендә федераль компетенцияләр үзәге» АКО заказы буенча Magram Market Research тикшергән.

Тикшеренүдә катнашучыларга биш раслауга бәя бирергә тәкъдим ителгән, анда һәр күрсәткеч 5 баллы шкала буенча бәяләнгән (1 – бөтенләй килешмим, 5 – тулысынча килешәм), һәр параметр өчен уртача балл исәпләнгән:

• Төбәк компетенцияләр үзәге белән бергә гамәлгә ашырыла торган хезмәт җитештерүчәнлеген арттыру проекты нәтиҗәләре минем предприятиенең финанс нәтиҗәләренә уңай йогынты ясый – 4,4;
• Төбәк компетенцияләр үзәге экспертлары югары дәрәҗәдә профессиональ һәм тормышка ашырылган проектларның максатларына ирешүдә сизелерлек өлеш кертте –  4,6;
• Җитештерүчәнлекне үстерү күрсәткечләренә ирешү өчен предприятиедә эшне ни рәвешле мөстәкыйль рәвештә дәвам итәргә кирәклегенә төшенү бар – 4,5;
• Безнең предприятиенең эш төркеме хезмәткәрләре киләчәктә безнең предприятиедә проектларны гамәлгә ашыру өчен шактый белем һәм күнекмәләр алды – 4,3;
• Безнең предприятие хезмәткәрләренең хезмәт җитештерүчәнлеген арттыру проектына җәлеп ителеше, Төбәк компетенцияләр үзәге экспертлары белән бергә эшләгәннән соң, 4,3%ка артты – 4,3.

Исегезгә төшерәбез, илкүләм проектта Татарстан Республикасының чимал булмаган база тармакларыннан 81 предприятие катнаша.

Предприятиеләрне «Хезмәт җитештерүчәнлеге һәм халыкны эш белән тәэмин итүгә ярдәм» илкүләм проектында катнашырга чакырабыз.