«Сакчыл җитештерү» проектының белем бирү аспекты

20 декабрьдә Чаллы шәһәрендә “Һөнәри белем бирүнең нәтиҗәлелеген һәм сыйфатын арттыру шарты буларак машина төзелеше кластеры үсеше” республика фәнни-гамәли конференциясендә “Сакчыл җитештерү” республика проектының белем бирү аспекты турындагы доклад белән Татарстан Республикасы сәнәгать һәм сәүдә министры урынбасары Гөлнара Әхмәдиева чыгыш ясады.
“Сакчыл җитештерү” методикасын гамәлгә ашыру буенча озак вакытлы максатчан республика программасы нигезенә белем белем бирүнең һәм нәтиҗәле җитештерү системаларының интеграциясе салынган. Республика Хөкүмәте Татарстан Республикасы Президенты Р.Н. Миңнеханов ярдәме белән 2010 елда Казан һәм Чаллы шәһәрләрендә ике уку-укыту үзәге төзү турында карар кабул итте. Шулай ук барлык дәрәҗәдәге белем бирү учреждениеләре өчен эксперимент рәвешендә “Сакчыл җитештерү принциплары һәм инструментлары” уку-укыту курсы эшләнде. 2012 елда бу программа кысаларында 10 лин-тренер әзерләнде, идарә итү командаларын “Лин-менеджмент” юнәлеше буенча яңадан әзерләү планы проекты барлыкка килде. Республика вузларында белем алучы студентлар сакчыл җитештерү темасына җитмештән артык фәнни хезмәт эшләде. Урта һөнәри белем бирү учреждениеләрендә дә әлеге методика кертелә башлады.
“Җитештерүне оештыру” укыту-методика үзәгендә Россия Федерациясенең төрле төбәкләреннән 129 фәнни-педагогик хезмәткәр укытылды. “Авиатөзелеш” регионара белем бирү үзәгендә Россиянең 48 урта һөнәри белем бирү учреждениеләре вәкилләре өйрәнү үтте.
“Сакчыл җитештерү” фәлсәфәсен һәм инструментларын кертү буенча Татарстан Республикасы Сәнәгать һәм сәүдә министрлыгы башкара торган эш кысаларында 2012 елның апрелендә “КАМАЗ” ААҖ базасында “Сакчыл җитештерү” принципларын кертү” буенча Татарстан Республикасы муниципаль берәмлекләре башлыклары өчен семинар уздырылды.