«Алабуга» махсус икътисадый зонаның Күзәтү советында 4 яңа проект хупланды

11 ноябрьдә “Алабуга” махсус икътисадый зонаның Күзәтү советы утырышы булды. Аны Күзәтү советы рәисе Рөстәм Миңнеханов үткәрде. Анда МИЗ резиденты статусына дәгъва белдерүче 4 проект каралды. Проектлар “Алабуга” махсус икътисади зонасы үсешенә этәргеч булачак. Моннан тыш яңа резидентлар федераль һәм төбәк бюджетына салым күләмен арттырачак. “Алабуга” махсус икътисади зонасы Күзәтү советы утырышында каралган проектларны ноябрьдә РФ Икътисади үсеш министрлыгы каршындагы махсус икътисади сәнәгать зоналары буенча эксперт советы утырышында тәкъдим итү көтелә.
Утырышта түбәндәге проектлар каралды һәм хупланды:
– “Форд Соллерс Алабуга” ҖЧҖ һәм башка җитештерүчеләр өчен җиңел автомобильләргә металл компонентлар җитештерүне оештыру буенча “Джошкуноз Алабуга” ҖЧҖ проекты. “Джошкуноз Алабуга” ҖЧҖ Төркиянең “Джошкуноз Холдинг” тарафыннан оештырылган, ул 60 елдан артыграк эшли. “Джошкуноз”ның клиентлары – “Форд”, “Фиат”, “Тойота”, “Фольксваген” һ.б.;
– пластмасс әйберләр җитештерүне җайга салу проекты. Проектның инициаторы – “Бытпласт” ҖЧҖ, ул 2000 елда Мәскәүдә гамәлгә куелган. Проектта –“Алабуга” МИЗ территориясендә көнкүреш өчен пластмасс әйберләр җитештерү каралган. “Түбән Кама Нефтехим” ҖЧҖ чималын файдалану күздә тотыла.
– гигиена продукциясе җитештерүне оештыру буенча “Хайджин Текнолоджиз” ҖЧҖ проекты. Компания Россиянең әйдәп баручы җитештерүчеләренең берсе, 2011 елның языннан халыкара холдинг составына кергән.
– “Черкизово” төркеменең ит продукциясе эшләп чыгаруны оештыру проекты. Баштан чит ил чималы кулланылачак, аннары Татарстан Республикасыннан җирле чималга күчү күздә тотыла.