Татарстан Республикасы Президенты Р. Миңнеханов «Нефть, газ, нефть химиясе-2012» XIX халыкара күргәзмәсе эшендә катнашты.

6 сентябрьдә «Нефть, газ, нефть химиясе-2012» XIX халыкара күргәзмәсе эшендә Татарстан Республикасы Президенты Р. Миңнеханов катнашты. Программа кысаларында күргәзмә экспозициясен карау, пленар утырыш, түгәрәк өстәл оештыру каралган иде. Республика башлыгы «Югары үзле нефть һәм табигый битум: эзләү һәм чыгару урынын әзерләү проблемасы һәм аларның нәтиҗәлелеген арттыру» халыкара фәнни-гамәли конференциясендә һәм «Республикада җитештерелгән нефть химиясе продукциясен юл төзелешендә һәм капиталь төзелештә куллануны арттыру» темасына түгәрәк өстәл эшендә катнашты.
«Югары үзле нефть һәм табигый битум: эзләү һәм чыгару урынын әзерләү проблемасы һәм аларның нәтиҗәлелеген арттыру» халыкара фәнни-гамәли конференциясендә катнашучыларны сәламләп, Р. Миңнеханов, әлеге теманың бик актуаль булуын билгеләп үтте. “Бүген яңа технологияләр һәм чималның яңа төрләре турында күп сөйлиләр, без табигый битумның өстенлегеннән файдаланырга тиеш. Фәнни бергәлекләр, “Татнефть” ААҖ тарафыннан бу җәһәттән шактый эшләр башкарылды.” Россия нефть, газ сәнәгате бергәлеге президенты Г. Шмаль кече нефть чыгару компанияләрендә яңа технологияләр кертүнең уңышлырак баруы хакында чыгыш ясады.
«Республикада җитештерелгән нефть химиясе продукциясен юл төзелешендә һәм капиталь төзелештә куллануны арттыру» темасына түгәрәк өстәлдә чыгыш ясап, Р. Миңнеханов, республиканың зур потенциалга ия булуын, әлеге базаны юл төзелеше һәм төзелеш өлкәләрендә файдаланырга кирәклеген, бу тармакта лидер булу мөмкинлеген билгеләп үтте.
«Татнефтехиминвест-холдинг» генераль директоры Рафинат Яруллин республиканың нефть химиясе өлкәсендәге мөмкинлекләре турында мәгълүмат бирде. Түгәрәк өстәл эшендә министрлыклар, ведомстволар, фәнни-тикшеренү үзәкләре һәм предприятиеләр вәкилләре катнашты.