Техник иҗатны үстерү

Татарстан Республикасы Сәнәгать һәм сәүдә министрлыгында министр Р.Зарипов Татарстан Республикасында техник иҗатны үстерү мәсьәләләренә багышланган киңәшмә үткәрде. Анда министрлык хезмәткәрләре, Татарстан Республикасы Мәгариф һәм фән министрлыгы, Татарстан Республикасы предприятиеләре һәм эшкуарлары ассоциациясе, югары уку йортлары вәкилләре катнашты.
Р. Зарипов Татарстан Республикасы Президенты Р. Миңнеханов тарафыннан куелган бурычларны үтәү өчен министрлыклар, ведомстволар, сәнәгать предприятиеләре һәм Татарстан Республикасы муниципаль берәмлекләре республикада техник юнәлештәге түгәрәкләр һәм секцияләр эшен җайга салу буенча уртак эш башкарырга тиешлеген билгеләп үтте.
Хәзерге вакытта республиканың техник һәм спорт юнәлешендәге 1249 берләшмәсендә 18894 бала һәм яшүсмер шөгыльләнә, бу өстәмә белем бирү учреждениеләрендәге балаларның гомуми санының 8,7 проценты.
Балалар һәм укучы яшьләр техник иҗаты системасын 10 профильле өстәмә белем бирү учреждениесе тәшкил итә, аларда спорт һәм техник иҗатка җәлеп ителгән балаларның 41,5 проценты шөгыльләнә. Техник иҗат берлекләрендә 13 – 18 яшьлек яшүсмерләр белем ала. Алар картинг, авиамоделизм, судомоделизм, автомоделизм, ракетомоделизм, мотоспорт һ.б белән шөгыльләнә.
Республикада мәктәп укучылары арасында ел саен техник иҗатның кайбер төрләре буенча ярышлар уздырыла. Мәсәлән, авиамодельләр ярышы 1939 елдан, автомодельләр ярышы 1990 елдан, ракета модельләре ярышы 1995 елдан бирле үткәрелә.
Республиканың алдынгы предприятиеләре, әйдәп баручы югары уку йортлары һәм махсус белем бирү учреждениеләре республиканың өстәмә белем бирү учреждениеләренә спонсорлык ярдәме күрсәтәләр. Мәсәлән, “Татнефть” ААҖ һәм А.Н. Туполев исемендәге КГТУ филиалы Әлмәтнең Яшь техниклар станциясенә, Бөгелмә муниципаль районының Балалар техник иҗат үзәгенә, Алабуга муниципаль районының балалар техник иҗат үзәгенә; «Түбән Каманефтехим» ААҖ – Түбән Кама муниципаль районының Балалар (яшүсмерләр) техник иҗат үзәгенә, Сарман муниципаль районының Яшь техниклар станциясенә; «Казан вертолет заводы» ААҖ, «Казан мотор төзелеше җитештерү берләшмәсе” ААҖ, «С.П.Горбунов исемендәге Казан авиация җитештерү берләшмәсе» ААҖ, КНИАТ ААҖ, А.Н.Туполев исемендәге КНИТУ, КГТУ (технологик университет) – Казан шәһәренең В.П. Чкалов исемендәге Балалар техник иҗат үзәгенә, Казанның Вахитов районы «Факел» балалар техник иҗат үзәгенә, Казан шәһәре Яңа Савин районының «Экологик, мәдәни һәм техник иҗат» мәктәптән тыш эшләр үзәгенә булыша.
Премьер-министры урынбасары – Татарстан Республикасының сәнәгать һәм сәүдә министры Р. Зарипов билгеләп үткәнчә, балалар техник иҗатын үстерү, эшче һәм инженер һөнәрләренең абруен арттыру, һөнәри юнәлеш бирү сыйфатын арттыру максатыннан ведомствоара эшче төркем төзелә.