Татарстан Республикасы һәм Газпромбанк хезмәттәшлеге арта

24 августта Татарстан Республикасы Сәнәгать һәм сәүдә министрлыгында министрлыклар, ведомстволар һәм республиканың сәнәгать предприятиеләре җитәкчеләре, “Газпромбанк” ААҖ җитәкчелеге катнашында киңәшмә үткәрелде, анда Хезмәттәшлек итү турында беркетмәгә кул куелды. Документка Татарстан Республикасы Хөкүмәте исеменнән Татарстан Республикасының сәнәгать һәм сәүдә министры Р. Зарипов, “Газпромбанк” ААҖ исеменнән Идарә рәисе урынбасары Ф. Канцеров кул куйды.
Әлеге Беркетмә Якларның ике як өчен дә файдалы озак вакытлы хезмәттәшлеген үстерүне күздә тота һәм Татарстан Республикасын социаль-икътисадый яктан үстерүгә һәм сәнәгать потенциалын арттыруга юнәлдерелгән.
Татарстан Республикасы белән хезмәттәшлек итү Газпромбанк эшчәнлегенең өстенлекле юнәлешләренең берсе. Корпоратив һәм физик затларга хезмәт күрсәтү офислары Казан, Чаллы, Түбән Кама, Әлмәт шәһәрләрендә эшли. Хәзерге вакытта кредит портфеленың күләме 7 млрд. сум тәшкил итә. Республика предприятиеләре белән берлектә 60тан артык “хезмәт хакы” проектлары гамәлгә ашырыла. Банк филиалларындагы кредит портфеленың күләме 952 млн. сум, кертемнәр күләме 283 млн. сум тәшкил итә.
Газпромбанк төркеме сәнәгать предприятиеләре линиясе буенча сәнәгать предприятиеләре белән хезмәттәшлек итү мөһим урынны алып тора.
«Ижорск заводлары», «Уралхиммаш», «Глазовхиммаш» Татарстан Республикасының нефть химиясе компанияләрен реактор җиһазлары белән тәэмин итә. Газпромбанк төркеме сәнәгать предприятиеләре «ТАИФ-НК» ААҖ, «Түбән Кама нефтехим» ААҖ, «ТАНЕКО» ААҖ җитештерү күәтләрен модернизацияләү һәм арттыру проектларында катнаша. Татарстанның нефть чыгару компанияләрен техник яктан яңадан җиһазландыру кысаларында бораулау җиһазлары белән тәэмин итү өлкәсендә хезмәттәшлек арта.
Хезмәттәшлек итү турындагы беркетмәдә Яклар икътисадның мөһим тармакларында ике як өчен дә файдалы булган хезмәттәшлекне дәвам итү ниятен белдерде. Газпромбанк катнашында инвестицияләү һәм коммерциячел кредит бирү өчен өстенлекле тармаклар буларак нефть чыгару, химия һәм нефть химиясе, машина төзелеше, оборона сәнәгате комплексы, азык-төлек сәнәгате һәм авыл хуҗалыгы, арзанлы торак төзелешен арттыруга юнәлдерелгән региональ программалар кысаларында төзелеш материаллары җитештерү предприятиеләре һәм оешмалары билгеләнде.
Мәгълүмат өчен:
"Газпромбанк" (Ачык акционер җәмгыять) – Россиянең иң эре универсаль финанс институтларының берсе. Ул корпоратив һәм физик затларга банк, финанс, инвестиция продуктлары хезмәте күрсәтә, барлык күрсәткечләр буенча Россиянең иң эре өч банкының берсе.