«Иң яхшы эретеп ябыштыручы-2012» һөнәри осталык конкурсының республика этабы Түбән Камада булачак

Эшче һөнәрләрнең абруен арттыру, эшче яшьләрнең алдынгы тәҗрибәсен пропагандалау максатыннан 8-9 августта Түбән Кама шәһәрендә “Үз эшенең остасы” Бөтенроссия һөнәри осталык конкурсы кысаларында «Иң яхшы эретеп ябыштыручы-2012» төбәк конкурсы үткәреләчәк. Аны Татарстан Республикасы Сәнәгать һәм сәүдә министрлыгы, "Түбән Кама нефтехим" ААҖ, республика эретеп ябыштыручылары берләшмәсе оештыра. Мәгълүмати ярдәм итү "Татмедиа" матбугат һәм массакүләм коммуникацияләр буенча республика агентлыгы тарафыннан башкарылачак.
«Иң яхшы эретеп ябыштыручы-2012» республика конкурсын оештыру комитеты рәисе, Татарстан Республикасының сәнәгать һәм сәүдә министры урынбасары Гөлнара Әхмәдиева әйтүенчә, "әлеге конкурс федераль статуска ия булды һәм җәмгыятьтәге үзгәрешләрне турыдан-туры чагылдыручы чарага әверелде. Эшче һәм инженер һөнәрләрнең абруе арта, кешенең һөнәри осталыгы аны бәяләүнең иң югары ноктасы була бара".
Һөнәри осталык конкурсында республика сәнәгатенең төрле тармакларындагы (нефть чыгару, нефть химиясе, машина төзелеше, энергетика) 20 предприятие вәкиле катнашачак, бәйгедә эретеп ябыштыру процесслары теориясен белү һәм торбаларны эретеп ябыштыру буенча гамәли күнекмәләр буенча көч сынашачаклар. Республика конкурсында җиңүчегә федераль бәйгедә катнашу хокукы бирелә, ул октябрьнең беренче ункөнлегендә Өфе каласында узачак.
Республика конкурсын йомгаклау һәм җиңүчеләргә бүләкләр тапшыру 9 августта 15 сәгатьтә "Түбән Кама нефтехим" ААҖ Халык иҗаты йортында үткәрелә.