Татарстан-Төркия сәүдә-инвестиция форумы – сәүдә багланышларын үстерү өчен җитди нигез

2012 елның 31 маенда Стамбул шәһәрендәТатарстан-Төркия сәүдә-инвестиция форумы булачак, анда Татарстан Республикасы Президенты Р. Миңнеханов, Россия Федерациясенең Төркиядәге Гадәттән тыш һәм Тулы вәкаләтле илчесе В. Ивановский, Төркиянең икътисад министры Зафер Чаглаян катнаша. Форум эшендә шулай ук Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов, Татарстан Республикасы Президенты ярдәмчесе И.Мөфлиханов, “Махсус икътисадый зоналар” ААҖ генераль директоры О. Костин, Төркиянең “Тускон” Сәнәгатьчеләр һәм эшкуарлар конфедерациясе рәисе Р. Мерал, Татарстанның машина төзелеше һәм нефть химиясе комплекслары предприятиеләре җитәкчеләре, Төркиянең автокомпонентлар эшләп чыгару кластеры, агач эшкәртү, җиһаз һәм җиңел сәнәгать компанияләре вәкилләре катнашачак.
Эшлекле форум кысаларында Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Равил Зарипов республиканың сәнәгать һәм инвестиция потенциалы презентациясе үткәрәчәк.

Форум кысаларында түбәндәге документларны имзалау планлаштырыла:
• «Татарстан» һәм «Төрек авиалинияләре» авиакомпанияләре хезмәттәшлеген үстерү турында меморандум;
• Төркия базарына КАМАЗ продукциясен кертү буенча «КАМАЗ» ААҖ, «РариТЭК» ҖЧҖ һәм Katmerciler компаниясенең хезмәттәшлек итү нияте турында беркетмә.
Татарстан һәм Төркия эшлекле даирәләре вәкилләре катнашында очрашулар булыр дип көтелә. Бүген бу ике ил арасындагы хезмәттәшлек күпкырлы булуы белән аерылып тора. Татарстан Республикасы Премьер-министры урынбасары – Татарстан Республикасының сәнәгать һәм сәүдә министры Р. Зарипов фикеренчә, бу форумның Стамбулда уздырылуы – ике яклы багланышларны тагын да үстерү өчен җитди нигез булып тора.
Мәгълүмат өчен:
Ике яклы тышкы сәүдә әйләнеше 2011 елда 794 млн. АКШ доллары тәшкил итте (экспорт – 563,3 млн. АКШ доллары, импорт – 230,8 млн. АКШ доллары).