«В. Б. Шнепп ис. турбокомпрессор фәнни-тикшеренү институты » ЯАҖ 55 еллыгы уңаеннан предприятие коллективын котлау

2012 елның 24 маенда «В. Б. Шнепп ис. турбокомпрессор фәнни-тикшеренү институты» ЯАҖ 55 еллыгына багышланган тантаналы чара уздырылды, анда Татарстан Республикасы Премьер-министры И.Халиков, Татарстан Республикасының сәнәгать һәм сәүдә министры урынбасары И.Мингалиев, фәнни-тикшеренү институты хезмәткәрләре, “Казанкомпрессормаш” ААҖ вәкилләре катнашты. Татарстан Республикасы Хөкүмәте башлыгы предприятиенең җитештерү цехларын карады, инновацияле техник эшләнмәләрне сынау үткәрелә торган стендлар белән танышты. Предприятиенең алдынгы хезмәткәрләренә Татарстан Республикасы Премьер-министры дәүләт бүләкләре һәм мактау кәгазьләре тапшырды.
Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Равил Зарипов предприятиенең хезмәт коллективын ябык акционер җәмгыятьнең 55 еллыгы белән котлады:
«Хөрмәтле коллегалар!
“Турбокомпрессор фәнни-тикшеренү институты” ябык акционер җәмгыятькә 55 ел тулды. Инженерлар һәм белгечләр төркеменнән торган институт бу еллар эчендә компрессорлар эшләп чыгару буенча әйдәп баручы конструкторлык, фәнни-тикшеренү һәм җитештерү үзәгенә әверелде.
Компрессорлар җитештерү буенча махсус конструкторлык бюросы буларак 1957 елның маенда оешкан институтны 1985 елга кадәр баш конструктор, техник фәннәр докторы, профессор Владимир Борисович Шнепп җитәкләде. Конструкторлык бюросы нигезендә төзелгән ябык акционер җәмгыять бүген аның исемен йөртә.
Институт үз тарихында күп тапкырлар СССР һәм Россия Федерациясенең эре масштаблы үсеш программаларында катнашты. Бу чорда институтта 370тән артык төрле типтагы компрессорлар уйлап табылды. “Турбокомпрессор фәнни-тикшеренү институты» эшләнмәләре буенча Россиянең һәм якын чит илләрнең алты заводында һәм ябык акционер җәмгыятьнең үзендә җитештерелгән компрессорлар металлургия, нефть, газ, нефть эшкәртү, нефть химиясе, файдалы казылмалар чыгару өлкәләрендә уңышлы кулланыла.
Бүген институтның үз фәнни-техник һәм җитештерү-эксперимент базасы бар. “Казанкомпрессормаш” ААҖ белән берлектә һәм техник фәннәр докторы, профессор, Татарстан Республикасы Фәннәр академиясе әгъза-корреспонденты И.Г.Хисамиев җитәкчелегендә институтта компрессорларның прогрессив модельләре проектлана, сынала һәм җитештерелә. Югары техник тәэмин ителеш һәм мәсьәләләрне чишүдәге яңалыклар уйлап табу эшчәнлеге белән үрелеп бара: институтта 400ләп патент һәм уйлап табуга авторлык шәһадәтнамәсе теркәлгән.
Фән һәм җитештерү интеграциясе институт үсешендә тулысынча чагылыш тапты. Эшне системалы оештыру нәтиҗәсендә заказчыга кирәкле әйберләрне эшләү вакыты кыскара. Моның нәтиҗәсе буларак, илнең эре компанияләре республика җитештерүчеләре белән хезмәттәшлек итүгә омтыла. Завод һәм институт озак еллар “Газпром” ААҖ һәм Татарстан Республикасы Хөкүмәтенең Икътисади һәм фәнни-техник хезмәттәшлеге программасында катнаша. 2011 елда “Газпром” ихтыяҗлары өчен 91 млн. сумлык компрессор җиһазлары җитештерелде.
«В. Б. Шнепп ис. турбокомпрессор фәнни-тикшеренү институты» ЯАҖ һәм “Казан компрессормаш” ААҖ арасындагы хезмәттәшлек республиканың компрессор җыючыларына алдынгылыкны саклап калырга һәм компрессор техникасын сатучы чит ил предприятиеләре белән уңышлы ярышырга гына түгел, бу өлкәдә дөнья лидерлары арасына керү мөмкинлеге дә бирә.
Татарстан Республикасы Сәнәгать һәм сәүдә министрлыгы исеменнән институтның 55 еллык юбилее белән котлап, аның озак еллар уңышлы эшләячәгенә ышанам. Барлык хезмәткәрләргә эшләрендә һәм тормышларында уңышлар телим!”