Казан электротехника заводына – 70 ел

“Казан электротехника заводы” ААҖнең оешуына 70 ел уңаеннан, 2012 елның 24 маенда Г. Камал исемендәге Татар дәүләт акдемия театрында тантаналы чара оештырылды. Анда Татарстан Республикасы Премьер-министры И.Халиков, Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Р.Зарипов, завод җитәкчеләре, хезмәткәрләре һәм ветераннары катнашты.
Хөкүмәт башлыгы И.Халиков Казан электротехника заводы коллективын юбилей белән котлады. “Заводны мин юкка гына легендар дип атамадым. һәрбер завод 70 еллык җитди хезмәт белән мактана алмый. Легендар, чөнки ул икенче бөтендөнья сугышында җиңү яулауда, сугыштан соңгы елларда халык хуҗалыгын торгызуда үзеннән зур өлеш керткән предприятие. Легендар, чөнки бу залда армия, флот өчен тиешле сыйфатлы кирәк-яраклар җитештерүче, аларны төзәтүче ветераннар утыра”,– дип билгеләп үтте республика Премьер-министры..
Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Р.Зарипов әйтүенчә , “заводның үсеш юлы җиңел булмады. 70 еллык тарих төрле чорлар, вакыйгалар, реформалар белән чуарланып беткән. Узган гасырның 40 нчы елларында эвакуацияләнгән предприятие ныклыкка сынау узып, катлаулы шартларда да нык басып торучанлыгын исбатлады”.
Сугыш елларында заводта артиллерия уты төзәүне контрольдә тоту системасы, маяк аппаратурасы җитештерелә, яңа катлаулы приборлар һәм диңгез автоматикасы схемалары эшләп чыгару үзләштерелә, илнең судно төзелешенә кирәкле приборлар җитештерелә. Сугыштан соңгы елларда халык хуҗалыгын торгызу өчен кирәкле приборлар эшләнә. Бу чорда эхолотларның төрле модельләре, күчмә маяк фонарьлары һәм төрле аппаратлар җитештерелә. Бүген Казан электротехника заводы – күәтле җитештерү потенциалы булган динамик үсүче предприятие. Заводның Хезмәт Кызыл Байрагы Ордены белән бүләкләнүе аның илебездәге абруе һәм сәнәгать үсешенә керткән өлеше хакында сөйли.