Татарстан Республикасында Химиклар көне

2012 елның 24 маенда “Баскет-холлда” Химиклар көненә багышланган тантаналы чара булды. Бәйрәмдә Татарстан Республикасы Президенты Р.Миңнеханов, ТР Дәүләт киңәшчесе М.Шәймиев, Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Р.Зарипов, республиканың нефть химиясе тармагы предприятиеләре җитәкчеләре, ВУЗ укытучылары һәм студентлары, мәктәп укучылары һәм укытучылар катнашты.
Президент Р. Миңнеханов: “әлеге залга республикабызда химия һәм нефть химиясе тармагын булдырган кешеләр, шулай ук безнең киләчәгебез – мәктәп укукчылары һәм укытучылар җыелган. Химия ул – үсеш ноктасы. Республикада потенциал һәрвакыт булды, бар һәм булачак. Безнең теләсә нинди катлаулы проектларны гамәлгә ашырырлык көчебез бар. Илнең химия тармагындагы иң заманча предприятиеләр Татарстанда урнашкан,”– дип билгеләп үтте.
Бәйрәмдә катнашучыларга мөрәҗәгать итеп, Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Р.Зарипов, химия сәнәгатенең күп еллардан бирле республиканың йөзек кашы булуын, Татарстанны Россиядән читтә дә танытуын ассызыклады.
Узган гасырның 70 нче елларында республикада илнең химия сәнәгате тармагындагы эре предприятиеләр – “Түбән Кама нефтехим”, “Казан органик синтез”, “Түбән Кама шин” һ.б төзелә. Бүген бу предприятиеләр синтетик каучук, полиэтилен һәм автомобиль шиннары эшләп чыгару буенча Россиядә иң алдынгылар. Бу җитештерү объектларында автомобиль һәм машина төзелеше өлкәсендә, кече һәм урта бизнеста кулланыла торган яңа материаллар үзләштерелә.
«Татнефть» компаниясе, “ТАНЕКО” нефть эшкәртү һәм нефть химиясе комплексын, “ТАИФ” компанияләр төркемен дә кертеп, илебездә генә түгел, чит илләрдә дә алдынгы предприятиеләр рәтендә. Бу социаль юнәлештәге оешмада җитештерү программалары һәм социаль программалар гамәлгә ашырыла.
Республикада индустрия мәйданчыклары барлыкка килде. Болар – “Химград” технополисы, Түбән Кама сәнәгать округы, “Кама Аланы” һәм М-7 индустрия парклары.
“Горурланырлык әйберләребез бар. 2011 елда төяп озатылган продукциянең 60 %ын нефть химиясе сәнәгате алып тора. Бу уңышларга сезнең хезмәтегез бәрабәренә ирешелде”, - диде Р. Зарипов.
Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры тармак предприятиеләрен төзүдә катнашкан, хәзер яшьләргә остаз ветеран химикларга рәхмәтен белдерде. Тармакның әйдәп баручы предприятиеләре җитәкчеләренә химия комплексын үстерүгә зур өлеш керткәннәре өчен Химиклар көне билгесе тапшырылды. Шулай ук предприятиеләрнең хезмәт династияләре, яшь галимнәр, студентлар һәм белгечләр адресына да котлау сүзләре яңгырады.
Бәйрәм чаралары кысаларында күргәзмә экспозициясе оештырылды. Чарада артислар, предприятиеләрнең иҗат коллективлары чыгыш ясады.