Сәнәгать электроникасы заводы төзелә башлады

2012 елның 24 маенда Татарстан Республикасы Президенты Рөстәм Миңнеханов «ICL-КПО ВС» предприятиесенең яңа заводына нигез салуда катнашты. Лаеш районында булган әлеге вакыйгада Татарстан Республикасы Премьер-министры урынбасары вазыйфаларын башкаручы – Татарстан Республикасының сәнәгать һәм сәүдә министры Равил Зарипов та катнашты.
Завод өч этапта төзеләчәк. Төзелешнең беренче этабына 600 млн. сум бүлеп бирелгән. Беренча этап 2013 елның беренче кварталында тәмамланачак. Тулысынча исә завод 2017 елда төзелеп бетеп эшли башлаячак.
Предприятие компьютер техникасы – персональ компьютерлар, ноутбуклар, серверлар һәм, сәнәгать электроникасын да кертеп, башка әйберләр җитештерү белән шөгыльләнәчәк. Предприятиенең җитештерү күәте елына 1 млн. данә булыр дип көтелә. Заводта «ICL» һәм «RAY» компанияләре бренды, шулай ук «Fujitsu Technology Solutions» заказы буенча «Fujitsu» бренды продукциясе җитештереләчәк.

Мәгълүмат өчен:
«ICL-КПО ВС» – илнең эре IT-предприятиеләренең берсе булган югары технологияле компания. Төп эшчәнлеге – программалар белән тәэмин итү, консалтинг хезмәтләре күрсәтү, компьютер техникасын системалы интеграцияләү һәм эшләп чыгару. 2011 елда компания үзендә җитештерелгән 65 мең данә продукция сатты.