Уңышлар юлдаш булсын!

2012 елның 18 маенда Татарстан Республикасының сәнәгать һәм сәүдә министры урынбасары Гөлнара Әхмәдиева КНИТУ – КАИ 80 еллыгына багышланган тантанада катнашты. Ул үзенең чыгышында әлеге уку йортының Россиядәге иң яхшы техник университетлар арасында үз урыны барлыгын билгеләп үтте.
1932 елда оешкан университетның тарихы илнең авиация һәм космонавтика үсеше белән бергә үрелеп бара. Ул Россиянең атаклы галим-механиклары, аэродинамика белгечләре, конструкторлары исеме белән тыгыз бәйләгән. Биредә ракета төзелеше өлкәсенә нигез салучылар – космик корабльләр генераль конструкторлары С.Королев һәм В.Глушко, авиация техникасы генераль конструкторы А. Туполев эшләгән. Уку йортын тәмамлаучылар арасында дәүләт эшлеклеләре, галимнәр, бизнес вәкилләре һ.б бар.
Вузда белемле, авиация һәм машина төзелеше өлкәсенең төрле тармаклары өчен югары квалификацияле белгечләр әзерләнә. Уку йортында 3000нән артык укытучы, фәнни хезмәткәр һәм инженер, шул исәптән, 120дән артык фән докторы һәм профессор, 700дән артык доцент һәм фән кандидаты эшли. 80 еллык тарихында университет 60 меңнән артыграк югары класслы инженер әзерләп чыгарды.
Университет федераль предприятиеләр белән хезмәттәшлек итә.”КАИ – Татарстан икътисады өчен белгечләр әзерләүче төп уку йортларының берсе, – дип билгеләп үтте Г. Әхмәдиева, – бу уку йортын тәмамлаучылар Татарстанның машина төзелеше предприятиеләрендә хезмәт итә һәм республикабызның динамик үсешенә зур өлеш кертә”.
Тантаналы чара уңаеннан спорт ярышлары уздырылды, күргәзмә оештырылган иде. Шулай ук академик С.П. Королевка 1 нче уку бинасында мемориаль такта ачылды, КАИ тәмамлаучылар үз осталыкларын күрсәтте, спорт һәм күңел ачу чаралары оештырылды.