«Россия вертолетлары» холдингы яңа идарә итү системасы куелган «Ансат» вертолетын демонстрацияләде

2012 елның 27 апрелендә “Оборонпром" берләшкән сәнәгать корпорациясенә керүче “Россия вертолетлары” холдингы, “Казан вертолет заводы” ААҖнең берничә максатта кулланыла ала торган җиңел “Ансат” вертолетын уңышлы демонстрацияләве хакында хәбәр итте. Әлеге вертолетларга яңа идарә итү системасы урнаштырылган.
Хәзерге вакытта "КВЗ" ААҖтә “Ансат”ның гидромеханик системалы ике прототибы эшләнгән. Берсе – һавада, икенчесе җирдә сынаулар үткәрү өчен яраклаштырылган. Бу сынаулар 2011 елдан бирле алып барыла. Сынаулар үткәрү программасы уңай нәтиҗәләр бирде һәм "КВЗ" ААҖ Дәүләтара авиация комитетына гидромеханик идарә итү системасын урнаштыруга сертификат алуга заявка бирде. "Ансат"ка сертификат алу бу төр вертолетларны пассажирлар ташу өчен сертификацияләү эшен дәвам итәргә мөмкинлек бирә.
"Россия вертолетлары" холдингы гидромеханик идарә итү системалы вертолетларның граждан билгеләнешендәге версияләре буенча маркетинг эше алып бара, Россия һәм чит ил заказчылары арасында мондый очкычлар зур кызыксыну уята, алар "Ансат"ның потенциаль сатып алучылары. Авиация тармагы экспертлары фикеренчә, яңартылган "Ансат" үз классындагы шундый ук очкычлар белән чагыштырганда, күп өстенлекләргә ия. Холдинг очкычны БДБ илләренә, көньяк-көнчыгыш Азия дәүләтләре, Африка, үзәк һәм Көньяк Америка илләре базарларына җибәрү белән шөгыльләнәчәк.
Казан вертолет заводында “Ансат” вертолетының төрле модификацияләре буенча сынау-конструкторлык эшләре дәвам итә, шул исәптән, тагын да камилләштерелгән очкыч булдыру максатыннан, база моделе яңартыла.