Ханты-Мансий автономияле округы – Югра делегациясенең Татарстан Республикасына визиты

2012 елның 6 апрелендә Татарстан Республикасына Ханты-Мансий автономияле округы губернаторы Н.В. Комарова җитәкчелегендәге делегация килә. Делегация составына округ Губернаторының беренче урынбасары Александр Ким, автоном округ – Югра департаментлары җитәкчеләре кертелгән.
Делегация Татарстан Республикасы Президенты Р.Н. Миңнеханов белән очрашачак, Универсиада авылын караячак, "Әкият" балалар мәдәни үзәгендә, югары технологияләр технопаркы «IT-паркта», "Химград" технопаркында, Татарстан Республикасы Милли музеенда булачак.
Кремльдә Татарстан Республикасы һәм Ханты-Мансий автономияле округы – Югра хөкүмәтләре арасында сәүдә-икътисадый, фәнни-техник һәм социаль-мәдәни хезмәттәшлек итү турында килешүгә кул куелачак.
Мәгълүмат өчен:
Ханты-Мансий автономияле округы Россия Федерациясенең төп нефть, газ чыгаручы төбәге. Самотлорский, Федоровский, Мамонтовский, Приобский газ һәм нефть чыганаклары иң эреләрдән санала.
Татарстан Республикасының Ханты-Мансий автономияле округы белән товар әйләнеше 2010 елда 2,04 млрд. сум тәшкил итте. Хезмәттәшлек итүдә «КАМАЗ» ААҖ, «Татнефть-Нефтехим» ҖЧҖ, «БЭНЗ» ААҖ, «КМПО» ААҖ, «Әлмәт торба заводы» ААҖ, «КМИЗ» ААҖ катнаша.