Казан вертолет заводының Яшьләр союзына – 20 ел

“Россия вертолетлары” Россия вертолетлар төзү холдингына керүче “Казан вертолет заводы” ААҖнең “Завод яшьләре союзы” (ЗЯС) иҗтимагый оешмасы 20 еллык юбилеен билгеләп үтте.
“Яшьләр сәясәте предприятиедәге кадрлар сәясәтенең бер өлеше, – дип билгеләп үтте генераль директор Вадим Лигай, – яшьләргә эшләү уңайлы булсын өчен кулыбыздан килгәннең барысын да эшлибез. Хәзерге вакытта предприятиедә хезмәт династиясенә нигез салучы яшь гаиләләргә ярдәм итәбез, шул исәптән матди яктан да”.
Хезмәт династияләренә ярдәм итү һәм аларны үстерү Казан вертолет заводының кадрлар сәясәтендә мөһим юнәлеш булып тора. Хәзерге вакытта КВЗда гомуми эшләү вакыты 350 ел тәшкил итүче хезмәт династияләре бар.
Заводта яшьләрне торак белән тәэмин итү буенча шартлар тудырылган. Бу максаттан 2006 елдан завод социаль ипотека программасында катнаша. Дәүләт торак фондына 350 млн.нан артык акча күчерелгән инде, 155 гаилә фатир алган.
ЗЯС 1992 елда завод яшьләре активы тәкъдиме белән оеша. Оешманың төп эше – предприятиегә яшьләрне җәлеп итү, алар белән эшләү, яшьләр өчен төрле чаралар оештыру, эш һәм социаль проблемаларны хәл итүдә булышу, яшьләрнең ихтыяҗын өйрәнү. Вертолет заводындагы яшьләр оешмасы Казан һәм Татарстан Республикасы предприятиеләрендә зур кызыксыну уятты. 20 еллык тарихында әлеге оешма шәһәр предприятиеләре яшьләре арасында лидер булып тора. Ике тапкыр “Татарстан Республикасында иң яхшы яшьләр оешмасы” конкурсында алдынгы урыннарны алды.