«Казан электроприбор заводы» ААҖ коллективы белән очрашу

2012 елның 26 гыйнварында Татарстан Республикасы Сәнәгать һәм сәүдә министры Равил Зарипов "Казан электроприбор заводы" ААҖ коллективы белән очрашты. Очрашуда сүз предприятиенең 2011 елгы эшчәнлеге нәтиҗәләре һәм 2012 елга куелган бурычлар хакында барды. Анда предприятие җитәкчеләре, һөнәри берлек һәм хезмәт коллективы вәкилләре, шулай ук Казан шәһәре башкарма комитетының Вахитов, Идел буе районнары хакимияте вәкилләре катнашты.
Татарстан Республикасының Сәнәгать һәм сәүдә министры очрашуда катнашучыларны республиканың социаль программаларны гамәлгә ашыру барышы белән таныштырып,"Казан электроприбор заводы" ААҖ коллективының республика сәнәгатенә керткән өлеше хакында сөйләде. Хезмәт коллективы вәкилләре муниципаль хакимият органнары эшчәнлегенә кагылышлы сораулар бирде.
Мәгълүмат өчен:
"Казан электроприбор заводы" – Россиянең авиация предприятиеләре арасында әйдәп баручыларның берсе. Анда эшләп чыгарылган продукция Россиядә һәм БДБ илләрендә җитештерелә торган очкычларда файдаланыла, чит илләргә чыгарыла.
Җитештерү күләмен арттыру максатында предприятие төрле типтагы датчиклар, йозаклар һәм бикләү җайланмалары кайтару өлешендә илнең автоҗыю заводлары белән хезмәттәшлек итәргә планлаштыра.
"Казан электроприбор заводы" – 2011 ел нәтиҗәләре буенча Татарстан Республикасы Хөкүмәтенең "Сыйфат өчен" конкурсы дипломанты.
«Электроприбор» социаль программаларны гамәлгә ашыра, "Мәдәни мирас – Свияжск утрау-шәһәр һәм борынгы Болгар" проектын тормышка ашыруда актив катнаша.