Юл хәрәкәте иминлеге мәсьәләләре – республика җитәкчеләренең игътибары үзәгендә

2011 елның 9 декабрендә Татарстан Республикасы сәнәгать һәм сәүдә министры Равил Зарипов Татарстан Республикасы Министрлар Кабинеты һәм Татарстан Республикасы буенча ЭЭМ коллегиясенең “Татарстан Республикасы Президентының “Татарстан Республикасында юл хәрәкәте иминлеген тәэмин итүнең өстәмә чаралары турында”гы Указын гамәлгә ашыру хакында” берләштерелгән утырышында катнашты.
Татарстан Республикасы Премьер-министры Илдар Халиков үзенең чыгышында республикада “2006-2012 елларга юл хәрәкәте иминлеге” федераль максатчан программасын гамәлгә ашыруның уңай нәтиҗәләре хакында билгеләп үтте: юлларда үлем-китем, имгәнүләр, шул исәптән балалар имгәнүе, кими, шулай да бу өлкәдә вәзгыятьне яхшырту өстендә эшне дәвам итәргә кирәклеге ассызыкланды.
“2006-2012 елларга юл хәрәкәте иминлеге” федераль максатчан программасын гамәлгә ашыру барышы белән Татарстан Республикасы буенча ЭЭМның ЮХИИДИ башлыгы Рифкат Миңнеханов таныштырды.
Татарстан Премьер-министры билгеләп үткәнчә, юллардагы үлем-китем күләме муниципаль берәмлек җитәкчелеге эшенең төп күрсәткече булып тора.

2011 елда мәктәп автобуслары катнашында юл-транспорт һәлакәтләре, шулай ук зыян күргән балалар саны да арткан. Бу – мәктәп автобуслары паркының артуына, ягъни 609 машинага җитүенә дә бәйле. Алар 20 меңнән артык балага хезмәт күрсәтә. Шул ук вакытта балалар имгәнүе, үткән ел белән чагыштырганда, 24 тән 18 гә кадәр кимегән.
Республикада юллар төзелешенә һәм аларны ремонтлауга зур акчалар тотыла. Узган ел аларның күләме 6 млрд. булган, 300 млн. сум ЮТҺ еш була торган урыннарны бетерүгә тотылган.
Утырышка йомгак ясап, Премьер-министр, бу мәсьәләнең мөхимлеген тагын бер кат билгеләп үтте. Статистиканың яхшыра баруына карамастан, һәлак булучылар күп. Министрлыклар, ведомстволар һәм муниципаль берәмлекләр юллардагы хәрәкәт иминлеген арттыру өстендә эшләргә тиеш.