Республика предприятиеләренең кадрлар хезмәте җитәкчеләре катнашында киңәшмә

2011 елның 9 декабрендә Татарстан Республикасы Сәнәгать һәм сәүдә министрлыгында республика предприятиеләренең кадрлар хезмәте җитәкчеләре катнашында киңәшмә уздырылды. Анда сәнәгать предприятиеләренең гомуми белем бирү учреждениеләренә шефлык итүе, фәнни-белем бирү кластерларының максатчан контрактлы әзерләү мәсьәләләре, бу эшнең матди-техник һәм интеллектуаль ягы һәм хезмәтне саклау мәсьәләләре каралды.
Киңәшмәдә Татарстан Республикасы сәнәгать һәм сәүдә министры урынбасары Гөлнара Әхмәдиева, министрлыкның, Икътисад министрлыгының структур бүлекчәләре башлыклары, Татарстан Республикасында дәүләт хезмәт инспекциясе, Хезмәтне саклауның төбәкара ассоциациясе, 40тан артык предприятие һәм уку йорты вәкилләре (Казан, Чаллы, Зеленодольск, Әлмәт, Алабуга һәм башка шәһәрләрдән) катнашты.
Татарстан Республикасы сәнәгать һәм сәүдә министры урынбасары Гөлнара Әхмәдиева, республиканың машина төзелеше комплексы предприятиеләренең – “КАМАЗ” ААҖ, “Әлмәт “Радиоприбор” заводы” ААҖ, “Әлмәт торба заводы” ААҖ, “Горький ис. Зеленодольск заводы”, “ЕлАЗ” ҖБ” ААҖ, “Казанькомпрессормаш” ААҖ, “Серго ис. завод” ҖБ” ФДУП, “Казан вертолет заводы” ААҖ һәм башкаларның һөнәри юнәлеш бирүгә, уку йортлары белән хезмәттәшлекне үстерүгә керткән өлешләрен билгеләп үтте.
Мәсәлән, сайлаячак һөнәрләре белән танышу һәм һөнәри әзерләнү максатыннан 2011 елда “Казанькомпрессормаш” ААҖндә Казан шәһәренең 5 мәктәбеннән 120 укучы булган. Бу предприятиедә йөздән артык остаз бар. Ел саен техник көллиятнең 50-60 укучысы һәм югары уку йортларының 450 дән артык студенты хезмәт практикасы үтә, шефлык ителә торган мәктәпләргә матди-техник, ысулый ярдәм күрсәтелә.
“Серго ис. завод” тарафыннан шефлык итү кысаларында 400 мең сумлык спорт инвентаре сатып алынган. Предприятиедә мәктәп укучыларын һәм студентларны спорт, мәдәни чараларга, хәрби-патриотик эстафетага, музей эшенә, предприятиенең җитештерү эшчәнлегенә җәлеп итү юлы белән традицияләрне саклап калырга һәм үстерергә омтылалар.
“Казан вертолет заводы” ААҖ 8 нче гимназия базасында өч физика-математика классы булдырды, аларда укучылар урта һәм югары техник һөнәри белем алуга әзерләнеп, махсус программа буенча белем ала. Олимпиадалар уздырыла, укучылар гомумроссия күләмендәге чараларда катнаша. Болар барасы да җитештерү процессы белән тыгыз бәйләнештә алып барыла.
КФУ һәм КНИТИ-КАИ вәкилләре чыгышында мәктәп укучыларын техник ВУЗларга керү өчен әзерләүдә, максатчан контрактлы хәзерлекне оештыруда республика университетлары тәҗрибәсе генә түгел, башка төбәкләрдәге коллегаларының да эше, проблемалар һәм аларны чишү юллары чагылыш тапты.
Татарстан Республикасында дәүләт хезмәт инспециясе һәм “Хезмәтне саклауның төбәкара ассоциациясе” КБО җитәкчеләре чыгышлары предприятиеләрдә хезмәтне саклауның актуаль мәсьәләләренә багышланды.
Киңәшмәдә эшче һәм инженер һөнәрләренең абруен арттыру, укуны техник һөнәрләр буенча дәвам итү мөмкинлеге бирү һәм матди-техник яктан ярдәм итү максатларында 2012 елның 1 февраленә кадәр гомуми белем бирү учреждениеләрен республика предприятиеләренә беркетү бурычы куелды. Белгечләрне максатчан контрактлы әзерләүнең нәтиҗәлелеген тикшерү максатында 2008-2011 елларда төзелгән шартнамәләргә анализ үткәрү хакында карар кылынды.
Предприятиеләргә хезмәтне саклау һәм хезмәт иминлеге буенча эшчәнлекне активлаштырырга, бу юнәлештә нәтиҗәле эшләгәннәрне билгеләп үтәргә һәм хезмәт шартларын бозу фактлары буенча административ чаралар күрергә тәкъдим ителде.