Ваклап сату базарлары турындагы Законга үзгәрешләр кертелде

2011 елның 9 декабрендә Россия Федерациясе Президенты Дмитрий Анатольевич Медведев “Ваклап сату базарлары турында һәм Россия Федерациясе Хезмәт кодексына үзгәрешләр кертү хакында” Федераль Законның 24 статьясына үзгәрешләр кертү турында” Федераль Законга кул куйды. Әлеге закон Дәүләт Думасы тарафыннан 2011 елның 18 ноябрендә кабул ителде һәм Федерация Советы тарафыннан 2011 елның 29 ноябрендә хупланды.
Законның 11 статьясында базарларны планлаштыру, яңадан планлаштыру һәм төзү, алар эчендәге биналарны, корылмаларны реконструкцияләү һәм модернизацияләү эшенә базарларның идарә итү компанияләре өчен 2013 елның 1 гыйнварыннан үтәү мәҗбүри булган таләпләр куела.
Моннан тыш, әлеге Федераль Законның 24 статьясындагы 3 өлеше нигезләмәләре буенча шул ук датадан базарларда вакытлыча корылмаларны товарлар сату (эшләр башкару, хезмәтләр күрсәтү) эшчәнлеген оештыру өчен куллану тыелачак. Федераль әһәмияттәге шәһәрләр – Мәскәү һәм Санкт-Петербургта, халык саны 500 меңнән артык булган РФ субъектлары башкаласында яисә административ үзәкләрендә бу таләпләр ваклап сату базарларына карата (авыл хуҗалыгы һәм авыл хуҗалыгы кооперативлары базарларыннан тыш) 2012 елның 1 гыйнварыннан ук гамәлгә кертелә.
Федераль закон белән бу срок халык саны 500 меңнән артык булган РФ субъектлары башкаласы яисә административ үзәкләре өчен 2013 елның 1 гыйнварына, федераль әһәмияттәге шәһәрләр – Мәскәү һәм Санкт-Петербург базарлары өчен 2012 елның 1 июленә күчерелә.