Татарстан Республикасы Сәнәгать һәм сәүдә министрлыгы

Сакчыл җитештерү – гамәлдә

2011 елның 23 ноябре, чәршәмбе

2011 елның 22 ноябрендә «Корстон» сәүдә-күңел ачу комплексында “Нәтиҗәле процесслар – югары җитештерүчәнлек” VI Халыкара Лин-форумы» үткәрелде. Форум эшендә Татарстан Республикасы Президенты Рөстәм Нургали улы Миңнеханов, РФ дәүләт хакимияте органнары җитәкчеләре, РФ Сәүдә-сәнәгать палатасы вәкилләре, халыкара Лин-тренерлар, Россия Федерациясенең эре сәнәгать предприятиеләре җитәкчеләре катнашты.

Чарада Татарстан Республикасының сәнәгать һәм сәүдә министры Равиль Зарипов, «Берләштерелгән авиатөзелеш корпорациясе» ААҖ Президенты Михаил Погосян, «ОБОРОНПРОМ» ОПК» ААҖ генераль директоры Андрей Реус, «КАМАЗ» ААҖ генераль директорының беренче урынбасары Юрий Клочков, «Лин-Коучинг» компаниясе генераль директоры Герт Хаар-Йоргенсен, Dаimler –AG менеджмент консалтингы бүлеге өлкән менеджеры доктор Франк Хетц, «Кайдзен - институты» консалтинг үзәге директоры Андрей Гавриченков чыгыш ясады

Пленар утырышта һәм мастер-классларда сүз "Сакчыл җитештерүне" республика предприятиеләре һәм оешмалары эшчәнлегенә кертү юлындагы алдынгы тәҗрибә хакында барды.

Равиль Зарипов әйтүенчә, республика предприятиеләре һәм оешмалары эшчәнлегенә Лин-технологияләрне кертүгә Татарстан җитәкчеләре һәртөрле ярдәм күрсәтә. Татарстанда, Россиядә беренчеләрдән булып, “Сакчыл җитештерү” максатчан программасы концепциясе эшләнде, 2011-2013 елларга “Сакчыл җитештерү”не кертү буенча максатчан программа булдырылды.

Лин-технологияләрне кертү эшен координацияләү Татарстан Республикасы Сәнәгать һәм сәүдә министрлыгына йөкләнде. Әлеге принциплар җитештерү һәм һөнәри белем бирү тармакларында кертелә.

Бүген республика икътисадының төрле өлкәләрендә: машина төзелеше, җиңел промышленность, нефть химиясе, энергетика, авыл хуҗалыгы, транспорт һәм элемтә, ТКХ, сәламәтлек саклауда 80 нән артык предприятие һәм оешмалар Лин-технологияләрне кертү проектына кушылды. Республиканың машина төзелеше предприятиеләре: “КАМАЗ”, “ЕЛАЗ”, “КМПО”, “ПОЗИС”, «Казанькомпрессормаш», «КВЗ», «Горький ис. Зеленодольск судно төзү заводы», «Горбунов ис. КАҖБ» ААҖ, «Алнас», «Казан электротехника заводы» һәм башкалар Лин-технологияләрне кертүдә әйдәп баручылар.

Лин-технолгияләр аз чыгым таләп итеп зур нәтиҗәләргә ирешү мөмкинлеге бирә: чыгымнар, продукциянең үзкыйммәте кими, хезмәт җитештерүчәнлеге арта, бизнес процесслары кыскара. 2006 елдан бирле "КАМАЗ" предприятиеләрендә "Сакчыл җитешәерү" технологияләрен кертү нәтиҗәсендә икътисадый нәтиҗә 16 миллиард сум, "ЕлАЗ”да – 293 млн. сум, "КМПО"да 705,5 млн. сум тәшкил итте.

Республикада зур тираж белән уку-укыту әсбабы нәшер ителде. Туполев ис. ГДТУда “Сакчыл җитештерү” буенча диплом эшләре якланды. Һөнәри әзерлек курслары барлыкка килде. 2010 елда предприятиеләрнең 1000, агымдагы елда 1 500 хезмәткәре өйрәнү узды.

Татарстан Республикасы Сәнәгать һәм сәүдә министрлыгы Лин-технологияләрне гамәлдә актив куллана. "Сакчыл офис" гамәли семинарлары уздырылды, министрлыкның 36 хезмәткәре квалификация күтәрү турында шаһәдәтнамә алды.

Лин-технологияләрнең яңа юнәлеше – “Сакчыл шәһәр” проекты. Ул хәзерге вакытта “Сакчыл шәһәр – Әлмәт” проектында гамәлгә ашырыла.

Республикабызда системалы рәвештә ведомствоара эшче төркем, сакчыл җитештерү принципларына нигезләнгән җитештерү системаларын үстерү буенча регионара Координация советы эшли. Әлеге Совет составына Татарстан, Башкортостан, Удмурт республикалары, Краснодар крае, Пенза һәм Самара өлкәләре вәкилләре керә.

Россия һәм чит ил компанияләре катнашында тәҗрибә алышу семинарлары һәм киңәшмәләре үткәрелә. Халыкара Лин-форумнар уздыру – “Сакчыл җитештерү”не кертү буенча тәҗрибә уртаклашу, ирешелгәннәрне башкаларга да күрсәтүнең иң нәтиҗәле алымнарының берсе. Булып узган форумда 600дән артык белгеч катнашты, Бөекбритания, Германия, Мәскәү, Татарстан, Башкортостан, Удмуртия, Марий-Эл республикалары, Ставрополь крае, Волгоград, Свердловск, Чиләбе, Курган, Түбән Новгород, Оренбург өлкәләренең эш тәҗрибәсе күрсәтелде.

Форум кысаларында Татарстан Республикасы сәнәгать һәм сәүдә министры Равиль Зарипов, «Берләштерелгән авиатөзелеш корпорациясе» ААҖ Президенты Михаил Погосян һәм А.Н. туполев ис. Казан милли тикшеренү техник университеты ректоры вазыйфаларын башкаручы Николай Абруков Хезмәттәшлек итү турында килешүгә кул куйдылар. Әлеге документта авиатөзелеш тармагында белгечләр һәм фәнни хезмәткәрләр әзерләү, аларның квалификацияләрен күтәрү, һөнәри юнәлеш бирү чаралары уздыру, уртак фәнни-тикшеренү инновация проектларын үтәү карала.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ